خاتون کے ساتھ مارپیٹ کا فرضی ویڈیو بنانے والے دو ملزم گرفتار

الور، 10 جنوری (یو این آئی) راجستھان کے ضلع الور کے بگڑ تراہا تھانہ علاقے میں پولیس نے ایک خاتون کو پیٹنے کا جعلی ویڈیو بنا کر سوشل میڈیا پر اپ لوڈ کرنے کے معاملے میں دو ملزموں کو گرفتار کیا ہے ۔ پولیس ذرائع نے ہفتے کے روز بتایا کہ ابتدا میں پولیس نے اس ویڈیو کو جھگڑے کا ویڈیو سمجھا۔ جب ویڈیو وائرل ہوا تو جانچ کی گئی۔ جانچ میں یہ ویڈیوفرضی ثابت ہوا۔ اس کے بعد پولیس نے ملزم میجر خان اور اس کے ساتھی روبن خان کو گرفتار کر لیا۔
تھانہ انچارج ونود سامریا نے بتایا کہ 9 جنوری کو سوشل میڈیا پر ایک ویڈیو وائرل ہوا تھا جس میں ایک نوجوان کو ایک خاتون کے ساتھ مارپیٹ کرتے ہوئے دکھایا گیا تھا۔پولیس نے معاملے کی حقیقت جاننے کے لیے ویڈیو بنانے والے ملزم میجر خان اور اس کے ساتھی روبن کو حراست میں لیا تو اصل حقیقت سامنے آ گئی۔ ملزم میجر خان نے بتایا کہ وہ ویڈیو بنانے کا کام کرتا ہے ۔
ان کی ایک ٹیم ہے جو مختلف قسم کے ویڈیوز بنا کر سوشل میڈیا پر وائرل کرتی ہے تاکہ زیادہ سے زیادہ لوگ دیکھیں اور کچھ کمائی ہو سکے ۔ پوچھ گچھ میں اس نے بتایا کہ اس نے روبن خان کو میواتی خاتون کا لباس پہنا کر اس کے ساتھ مارپیٹ کا ویڈیو تیار کیا تھا۔
پولیس نے دونوں ملزموں کو گرفتار کرکے کینڈڈ کیمرا، میواتی خواتین کے ملبوسات، زیب و زینت کا سامان اور موبائل فون برآمد کیے ہیں۔ ویڈیو بنانے والے میجر خان پک اپ ڈرائیور ہیں جبکہ رابن ایک ٹرک میں بطور ہیلپر کام کرتا ہے ۔