بدھ کی تعلیمات دبائو سے نہیں، مکالمے اور اخلاقی طرز عمل کے ذریعے پوری دنیا میں پھیلیں

نئی دہلی، 5 جنوری (یو این آئی) بدھ مت کی تعلیمات اور دنیا بھر میں اس کے پھیلنے کے بارے میں مفکرین کا ماننا ہے کہ بھگوان بدھ کی تعلیمات طاقت یا دبائوکے ذریعے نہیں بلکہ مکالمے اور اخلاقی طرز عمل کے ذریعے پوری دنیا میں پھیلی ہیں اور پپرہوا کے آثار کی وطن واپسی مشترکہ ذمہ داری کی علامت ہے نہ کہ ملکیت کی۔
وزیر اعظم نریندر مودی کے ہفتہ کو یہاں مقدس پپرہوا باقیات کی عظیم الشان بین الاقوامی نمائش کا افتتاح کے بعد پتھورا کلچرل کمپلیکس میں بدھ مت کے فلسفے پر منعقدہ پینل مباحثے میں شامل دانشوروں نے پپرہوا آثار کی واپسی کو آسان بنانے میں وزیر اعظم مسٹر مودی، وزارت ثقافت اور ان کے ساتھیوں کی مربوط کوششوں کی تعریف کی اور کہا کہ ثقافتی تحفظ، عالمی خیر سگالی، امن اور مشترکہ انسانی اقدار کے لیے یہ ہماری غیر متزلزل وابستگی کی علامت ہے ۔
نو نالندہ مہاوہار (ڈیمڈ یونیورسٹی) کے وائس چانسلر پروفیسر سدھارتھ سنگھ نے اپنے صدارتی خطاب میں کہا کہ مہاتما بدھ کی تعلیمات زورزبردستی سے نہیں، بلکہ مکالمے ، اخلاقی طرز عمل اور ذاتی مثال کے ذریعے پوری دنیا میں پھیلی ہیں۔ بدھ مت، دیگر عقیدے پر مبنی روایات کی طرح تبدیلی مذہب تبدیل کے بجائے انسانی ذہن کو پاک کرنے اور مصائب کو دور کرنے کی کوشش کرتا ہے ۔ انہوں نے کہا کہ بدھ کے آثار عصری پیروکاروں کو تاریخی بدھ سے جوڑ کر زندہ روایات کو برقرار رکھتے ہیں اور پپرہوا آثار کی وطن واپسی ملکیت کی بجائے مشترکہ ذمہ داری کی علامت ہے ۔
بابا صاحب بھیم رائوامبیڈکر یونیورسٹی، لکھنئو کے سابق رجسٹرار پروفیسر نلین کمار شاستری نے کہا کہ پپرہوا کے آثار کی واپسی امن اور مربوط قومی ترقی کے رہنما کے طور پر بدھ مت کے فلسفے کی نئی مطابقت کو ظاہر کرتی ہے ۔ انہوں نے کہا کہ بدھ مت کی فکر قدیم حکمت کو اخلاقی حکمرانی، ماحولیاتی پائیداری اور ذہنی بہبود جیسے عصری خدشات سے جوڑتی ہے ۔
دہلی یونیورسٹی کے شعبہ فلسفہ کے پروفیسر بالا گنپتی نے کہا کہ بدھ مت کی عالمی قبولیت اس کی فلسفیانہ گہرائی اور اخلاقی عالمگیریت میں مضمر ہے ۔ پپرہوا باقیات کو بدھ کے پیغام کا زندہ ثبوت قرار دیتے ہوئے ، انہوں نے کہا کہ بدھ مت کا فلسفہ بکھرتی ہوئی دنیا میں امن، بقائے باہمی اور اخلاقی وضاحت کے لیے ایک عملی اور انسانی فریم ورک فراہم کرتا ہے ۔