جنوبی افریقہ میں مسلح افراد کی اندھا دھند فائرنگ 9 ہلاک

جوہانسبرگ، 22 دسمبر (یو این آئی) جنوبی افریقہ میں مسلح افراد نے سڑکوں پراندھا دھند فائرنگ کرکے لوگوں کو بھون ڈالا، جس سے 9 ہلاک اور دس زخمی ہو گئے ۔
غیر ملکی میڈیا کے مطابق پولیس نے بتایا ہے کہ جنوبی افریقہ میں جوہانسبرگ شہر کے مغرب میں واقع بیکرزڈال ٹاؤن شپ میں فائرنگ کے ایک بڑے واقعے میں کم از کم نو افراد ہلاک اور دس زخمی ہوگئے ہیں۔
فائرنگ میں ملوث افراد کی گرفتاری کے لیے اس وقت سرچ آپریشن جاری ہے ۔ یہ واقعہ ایک پب میں رات ایک بجے کے آس پاس پیش آیا، پولیس کا کہنا ہے کہ کم از کم دس مسلح افراد نے سڑکوں پر لوگوں کو بلا امتیاز نشانہ بنایا۔
جنوبی افریقی پولیس نے ایک بیان میں کہا کہ ایک سفید منی بس اور سلور سیڈان میں سوار نامعلوم مشتبہ افراد نے ایک ہوٹل کے سرپرستوں پر فائرنگ کی اور پھر فرار ہوتے ہوئے بلا امتیاز سڑکوں پر فائرنگ جاری رکھی۔
پہلے ہی جرائم سے شدید متاثر ملک جنوبی افریقہ کو اس حملے نے ہلا کر رکھ دیا ہے ، جہاں دنیا میں قتل کی شرح انتہائی زیادہ ہے ، پولیس کا کہنا ہے کہ فائرنگ کے محرکات کے تعین کے لیے تحقیقات کی جا رہی ہیں۔
یاد رہے کہ رواں ماہ کے آغاز میں مسلح افراد نے پریٹوریا کے قریب ایک بار میں فائرنگ کر کے کم از کم 12 افراد کو ہلاک کر دیا تھا، جن میں ایک تین سالہ بچہ بھی شامل تھا۔