چین میں رہائشی کمپاؤنڈ میں چاقو حملہ، 3 افراد ہلاک

بیجنگ، 20 دسمبر (یو این آئی) چین کے گوانگ شی ژوانگ خودمختار خطے میں رہائشی کمپاؤنڈ میں چاقو حملے میں 3 افراد ہلاک اور ایک شخص زخمی ہو گیا۔
بین الاقوامی خبر رساں ادارے کی رپورٹ کے مطابق مقامی حکام نے تصدیق کرتے ہوئے بتایا ہے کہ یہ واقعہ جمعہ کی صبح تقریباً 7 بجے لائبن شہر کی کاؤنٹی شِن چَنگ میں پیش آیا۔
پولیس نے مشتبہ حملہ آور کو قابو میں لے لیا ہے ۔ زخمی شخص کو فوری طور پر ہسپتال منتقل کر دیا گیا ہے جبکہ واقعے کی تحقیقات شروع کردی گئی ہیں۔
اس سے قبل امریکی ریاست مشی گن میں نامعلوم شخص نے چاقو حملے میں 11 افراد کو زخمی کردیا تھا۔
برطانوی نشریاتی ادارے کی رپورٹ کے مطابق مشی گن حکام نے بتایا کہ والمارٹ سپر مارکیٹ میں چاقو کے وار سے 11 افراد ہوئے ، واقعے کے بعد ایک مشتبہ شخص کو حراست میں لے لیا گیا تھا۔
اسپتال حکام کا کہنا تھا کہ 11 زخمیوں کا علاج کیا جا رہا ہے ۔ منسن میڈیکل سینٹر نے سوشل میڈیا پر کہا کہ ہمارا ایمرجنسی ڈیپارٹمنٹ اس وقت معمول سے زیادہ تعداد میں مریضوں کا سامنا کر رہا ہے ۔
مقامی میڈیا رپورٹس کے مطابق تین افراد کی سرجری ہو رہی ہے ۔ آن لائن پوسٹ کی گئی فوٹیج میں والمارٹ کے کار پارک میں متعدد پولیس اور ایمبولینس یونٹ دکھائے گئے ۔