جموں/۳ دسمبر
لیفٹیننٹ گورنر منوج سنہا نے بدھ کو کہا’’میں دِویانگ جن کی ہمت، عزم اور صلاحیت کو سلام پیش کرتا ہوں۔ ہم ایک ایسے نظام کی تعمیر کے لیے پرعزم ہیں جو ان کے خوابوں اور امنگوں کے مطابق ہو، اور تمام رکاوٹوں اور چیلنجز کو دور کرے‘‘۔
سنہا گاندھی نگر میں پدما شری پدما ساچدیوا گورنمنٹ کالج فار ویمن میں ’’بین الاقوامی یومِ معذورین‘‘ کی ایک تقریب سے خطاب کر رہے تھے۔
یہ تقریب کمپوزٹ ریجنل سینٹر فار اسکل ڈیولپمنٹ، ری ہیبیلی ٹیشن اینڈ ایمپاورمنٹ آف پرسنز وِد ڈس ایبیلیٹیز (سی آر سی)، جموں نے ’قابلیت کا جشن، ثقافت کا تحفظ‘کے عنوان کے تحت منعقد کی۔ اس سال کے بین الاقوامی یومِ معذورین کا عالمی موضوع ’سماجی ترقی کو بڑھانے کیلئے معذوری شمولیت پر مبنی معاشروں کا فروغ‘ ہے۔
اپنے خطاب میں لیفٹیننٹ گورنر نے تمام سرکاری افسران اور سماجی تنظیموں سے اپیل کی کہ وہ دِویانگ جن کے حقوق کے تحفظ اور فروغ کا عہد کریں۔
لیفٹیننٹ گورنر نے کہا’’دِویانگ جن کی شمولیت منصفانہ ترقی کی بنیاد ہے۔ ہمیں حساسیت، آگاہی اور مشترکہ عزم کے ساتھ کام کرنا ہوگا تاکہ ان کی عزتِ نفس، باوقار شمولیت، اور تعلیم، ہنر اور روزگار تک ان کی رسائی کو یقینی بنایا جا سکے‘‘۔
سنہا نے یو ٹی انتظامیہ کی وہ کلیدی پہلوں کا ذکر کیا جو دِویانگ افراد کی سماجی و معاشی بااختیاری کے لیے کی جا رہی ہیں۔
ایل جی نے کہا کہ وزیر اعظم نریندر مودی کی قیادت میں دِویانگ جن کو مساوی مواقع، مساوی حقوق اور معیاری زندگی فراہم کرنے کیلئے خصوصی کوششیں کی گئی ہیں۔
لیفٹیننٹ گورنر نے کہا’’ہمیں مل کر ایک ایسا جموں و کشمیر بنانا ہے جہاں رسائی عام ہو، جہاں ہر دِویانگ جن کو تمام سہولیات تک رسائی ہو، برابر روزگار کے مواقع ملیں، اور وہ جدید تکنیکی آلات دستیاب ہوں جو انہیں باوقار زندگی گزارنے کے لیے ضروری ہیں‘‘۔
سنہا نے کمپوزٹ ریجنل سینٹر جموں کی بھی تعریف کی جو دِویانگ افراد کی بحالی اور بااختیاری کیلئے قابلِ تعریف کوششیں کر رہا ہے۔
سنہ۲۰۲۴ سے سی آر سی جموں نے ۳۵ ہزار سے زائد کلینیکل سروے کیے ہیں اور ۲ کروڑ روپے سے زیادہ مالیت کے معاون آلات تقسیم کیے ہیں، جس سے بے شمار زندگیوں میں تبدیلی آئی ہے۔
موقع پر لیفٹیننٹ گورنر نے مستفیدین کو معاون آلات اور کِٹس بھی تقسیم کیں اور مختلف سماجی تنظیموں کے لگائے گئے اسٹالوں کا معائنہ بھی کیا۔
باہو سے رکنِ اسمبلی وکرم رندھاوا؛ پروفیسر (ڈاکٹر) شیخ اعجاز بشیر، ڈائریکٹر کالجز؛ ڈاکٹر روہنیکا شرما، ڈائریکٹر سی آر سی جموں (سانبہ)؛ سینئر افسران، تعلیمی اداروں کے سربراہان، سرکردہ شہری، مختلف سماجی تنظیموں کے اراکین، طلبہ اور عوام کی بڑی تعداد موجود تھی۔ڈی آئی پی آر
