ناؤ پورہ خانیار میں آتشزدگی ‘پانچ رہائشی مکان خاکستر

سرینگر/۳دسمبر
شہر خاص کے گنجان آبادی والے علاقے ناو پورہ خانیار میں بدھ کی علی الصبح آتشزدگی کے ایک واقعے میں پانچ رہائشی مکان خاکستر ہوئے ہیں۔
فائر اینڈ ایمرجنسی سروسز کے مطابق آگ بدھوار پونے دو بجے ایک رہائشی مکان سے نمودار ہوئی، جس نے چند ہی منٹوں میں قریبی چار مزید مکانوں کو اپنی لپیٹ میں لے لیا۔ علاقہ چونکہ تنگ گلیوں پر مشتمل ہے ، لہٰذا شعلوں نے برق رفتاری سے پوری بستی کو خوف و ہراس میں مبتلا کر دیا۔ مقامی شہریوں کے مطابق دھوئیں کا گہرا بادل دور سے بھی نظر آ رہا تھا۔
فائر اینڈ ایمرجنسی کے ایک سینئر عہدیدار نے یو این آئی کو بتایا کہ پونے دو بجے اطلاع ملتے ہی فائر اینڈ ایمرجنسی کے اہلکار جائے موقع پر پہنچے اور آگ بجھانے کی کارروائی شروع کی۔انہوں نے کہاکہ انتھک کوشش کے بعد آگ پر قابو پایا گیا۔
مقامی نوجوانوں نے بھی فائر اینڈ ایمرجنسی کے اہلکاروں کے ساتھ مل کر گھروں سے سامان نکالنے کی کوشش کی، مگر شعلوں کی شدت کے باعث زیادہ تر گھریلو ساز و سامان جل کر راکھ بن گیا۔
متاثرہ خاندانوں نے بتایا کہ آگ نے انہیں چند ہی لمحوں میں بے گھر کر دیا۔ ایک متاثرہ خاتون نے روتے ہوئے کہا،’’ہم کچھ بھی نہیں بچا پائے ۔ سب کچھ جل گیا،کپڑے ، دستاویزات، زیورات، بچوں کی کتابیں سب کچھ۔ راکھ کے ڈھیر میں تبدیل ہوا‘‘۔
پولیس نے بتایا کہ آتشزدگی کی وجہ فوری طور پر معلوم نہیں ہو سکی ہے ۔ انہوں نے کہا کہ تکنیکی ٹیم کو طلب کر کے وجوہات کی تحقیق شروع کر دی گئی ہے ۔
ناؤ پورہ کی یہ آتشزدگی سردیوں کی آمد کے ساتھ شہر میں پیش آنے والے سنگین واقعات میں سے ایک ہے ، جس نے نہ صرف املاک کو تباہ کیا بلکہ درجنوں افراد کو موسم کی شدید سردی میں کھلے آسمان تلے کر دیا ہے ۔ انتظامیہ نے یقین دلایا ہے کہ متاثرین کی بحالی کے لیے ہر ممکن مدد فراہم کی جائے گی۔یو این آئی