سرینگر/۲۷نومبر
سوشل میڈیا پر ایک ویڈیو وائرل ہونے کے بعد پولیس نے فوری کارروائی کرتے ہوئے مشہور سیاحتی مقام سونہ مرگ میں ہنگامہ آرائی اور عوامی سکون میں خلل ڈالنے کے الزام میں دو افراد کو حراست میں لے لیا۔
پولیس کے مطابق گرفتار شدہ افراد کی شناخت معراج الدین شیخ ولد محمد صابر ساکن کلن اور محمد ارشد میر ولد ثنا اللہ میر ساکن گنڈ کے طور پر کی گئی ہے ۔ دونوں افراد ویڈیو میں بدنظمی، شور شرابہ اور سیاحوں سمیت مقامی لوگوں کو پریشان کرتے ہوئے نظر آئے ۔
پولیس اسٹیشن سون مرگ کی ٹیم نے فوری کارروائی کرتے ہوئے دونوں کو موقع پر ہی پکڑ لیا اور ان کے خلاف قانونی کارروائی شروع کی۔
پولیس نے بتایا کہ دونوں افراد کو ان کے غیر ذمہ دارانہ رویے پر متنبہ کیا گیا اور بعد میں ایگزیکٹیو مجسٹریٹ فرسٹ کلاس گنڈ کے روبرو پیش کیا گیا، جہاں سے ان کے خلاف قانون کے مطابق کارروائی عمل میں لائی گئی۔
پولیس نے اپنے بیان میں کہا کہ ضلع گاندربل کے تمام سیاحتی مقامات، خصوصاً سون مرگ میں سیاحوں کو محفوظ، پُرامن اور ہراسانی سے پاک ماحول فراہم کرنا پولیس کی اولین ترجیح ہے ۔
پولیس نے مزید کہا کہ اگر کسی سیاح یا مقامی شخص کو کوئی ہراسانی یا دشواری پیش آئے تو وہ فوری طور پر نزدیکی پولیس اسٹیشن کے ساتھ رابط قائم کریں۔ایجنسیز
