میرپور20 نومبر (یو این آئی ) بنگلہ دیش نے دوسرے ٹیسٹ کے دوسرے دن اپنی پہلی اننگز میں 476 رنز کا بڑا مجموعہ کھڑا کرنے کے بعد آئرلینڈ کی ٹیم کو 98 رنز پر پانچ وکٹ پر محدود کرکے میچ پر اپنی مضبوط گرفت قائم کر لی ہے۔
بنگلہ دیش نے دوسرے دن اپنے گزشتہ اسکور 294/4 سے اننگز آگے بڑھائی۔ تجربہ کار وکٹ کیپر بیٹر مشفق الرحیم نے اپنے 100ویں ٹیسٹ میں شاندار سنچری اسکور کی۔ وہ 106 رنز بناکر میتھیو ہمفرِیز کی گیند پر آؤٹ ہوئے۔ ان کی اننگز 214 گیندوں پر مشتمل تھی جس میں پانچ چوکے شامل تھے۔
بعد ازاں مہدی حسن میراث اور لٹن داس نے چھٹے وکٹ کی شراکت میں 123 رنز جوڑ کر اسکور کو مضبوط بنیاد فراہم کی۔ مہدی حسن 48 رنز بنا کر آؤٹ ہوئے۔ دوسری جانب لٹن داس نے 128 رنز کی شاندار اننگ کھیلی جس میں آٹھ چوکے اور چار چھکے شامل تھے۔بنگلہ دیش کی اننگز 476 رنز پر اختتام کو پہنچی۔ آئرلینڈ کی جانب سے اینڈی میکبرائن نے شاندار بالنگ کرتے ہوئے 6 وکٹیں حاصل کیں، جبکہ ہمفرِیز اور گیون ہوئے نے دو، دو وکٹیں لیں۔جواب میں آئرلینڈ نے محتاط انداز میں آغاز کیا۔ اسٹرلنگ (27) اور میکبرائن (21) نے 41 رنز کی اوپننگ شراکت قائم کی۔ تاہم اس کے بعد بنگلہ دیشی بولروں نے واپس میچ پر گرفت مضبوط کر لی۔کیڈ کارمائیکل (17)، ہیری ٹیکٹر (14) اور کیرٹس کیمفر (0) جلد ہی آؤٹ ہو گئے۔
دن کے اختتام پر آئرلینڈ نے 98/5 اسکور کیا تھا۔ لورکن ٹکر 11 اور اسٹیفن ڈوہینی 2 رنز پر ناٹ آؤٹ تھے۔بنگلہ دیش کی جانب سے حسن مراد نے 2 وکٹیں جبکہ خلیل احمد، تیج الاسلام اور مہدی حسن میراث نے ایک، ایک وکٹ حاصل کی۔
