جموں/۱۹ نومبر
’ہم خو کفیل جموں کشمیر کی عمارت پولیس اہلکاروں، فوجیوں، کسانوں، نوجوانوں اور خواتین کی لگن اور قربانیوں کی بنیاد پر تعمیر کر رہے ہیں۔ آج ہمیں عہد کرنا چاہیے کہ ان کی محنت اور قربانیاں ضائع نہ ہونے دیں۔ ہمیں ان کے خوابوں کو حقیقت میں بدلنے کا عزم کرنا ہوگا‘‘۔
لیفٹیننٹ گورنر‘ منوج سنہا بدھ کو پرمندل میں پرمندل،اتر بہنی تیردھ سیوا نیاس کے فاؤنڈیشن ڈے کے موقع پر خطاب کر رہے تھے۔
لیفٹیننٹ گورنر نے قدیم شیو مندر، پرمندل میں حاضری دی اور دیویکا مہا آرتی میں شرکت کی۔
سنہا نے خطاب کرتے ہوئے کہا کہ پرمندل،اتر بہنی کو ایک عالمی معیار کا روحانی مرکز بنانے کے لیے حکومت پوری کوشش کرے گی تاکہ پائیدار اور ثقافتی لحاظ سے بھرپور مذہبی سیاحت کو فروغ دیا جا سکے۔
ان کاکہنا تھا’’پرمندل،اتر بہنی تیردھ کشیترا جموں و کشمیر میں ایمان، ثقافتی یکجہتی اور تنوع کا سنگم ہے۔ یہ خود کی پاکیزگی اور خود شناسی کے لیے ایک مقدس زیارت ہے، جو برکتیں نچھاور کرتا اور محبت، احترام اور بھائی چارے کو فروغ دیتا ہے۔ پرمندل ہماری ابدی ثقافت کی روح کی نمائندگی کرتا ہے۔ گوپت گنگا دیویکا کے کنارے واقع مقدس اومپتی مہادیو مندر جے اینڈ کے کے اہم روحانی زیارت گاہوں میں سے ایک ہے‘‘۔
ایل جی نے کہا’’صدیوں سے، پرمندل سماجی ہم آہنگی، کمیونٹی سروس، اور ماحولیاتی تحفظ کے لیے ایک رہنما رہا ہے، جس نے جموں و کشمیر کے لوگوں کو نئی سمت اور مقصد فراہم کیا ہے‘‘۔
پرمندل،اتر بہنی تیردھ سیوا ٹرسٹ کی درخواستوں پر ردعمل دیتے ہوئے، لیفٹیننٹ گورنر نے یقین دہانی کرائی کہ انتظامیہ اور متعلقہ محکمے مذہبی اور ثقافتی ورثے کے تحفظ کے لیے تمام سرکاری محکموں کے اشتراک سے کام کریں گے۔
سنہا نے ضلع انتظامیہ سامبا کو ہدایت دی کہ نئے وید ویدیالیہ کے لیے سرکاری زمین کی نشاندہی کی جائے۔ شری ماتا ویشنو دیوی شرائن بورڈ اس کے قیام کے لیے مالی معاونت فراہم کرے گا، جیسا کہ اس نے کئی وید ویدیالیہ، سنسکرت پٹھشالہ اور گاؤ شالوں کے قیام میں مدد کی ہے۔
لیفٹیننٹ گورنر نے علاقے میں گروکل، سنسکرت پٹھشالہ یا وید پٹھشالہ کے قیام کے لیے بھی مالی معاونت کی یقین دہانی کرائی۔ انہوں نے کہا کہ پرمندل کو چار لین سڑک سے جوڑنے کے مسئلے کو بھی حکومت ہند کے ساتھ اٹھایا جائے گا۔
وزیر اعظم شری نریندر مودی کی قیادت میں جموں و کشمیر کی قابلِ مشاہدہ اور غیر مشاہدہ تبدیلیوں کی وضاحت کرتے ہوئے انہوں نے کہا کہ یہ تبدیلیاں نہ صرف بنیادی ڈھانچے بلکہ ثقافتی اور روحانی ورثے کی بحالی پر مرکوز ہیں۔ پچھلے چار سالوں میں تقریباً ۶۲ قدیم مذہبی اور تاریخی مقامات کی بحالی کی گئی ہے۔ ان کاکہنا تھا’’ہمارا مقصد ہمیشہ سے یہ رہا ہے کہ ہم اپنے روحانی ورثے کو بحال کریں اور یونین ٹیریٹری میں روحانی سیاحت کو فروغ دیں‘‘۔
لیفٹیننٹ گورنر نے پرمندل،اتر بہنی تیردھ سیوا نیاس، وشوا ہندو پریشد اور دیگر تنظیموں کی جموں و کشمیر کے روحانی اور ثقافتی ورثے کے تحفظ اور فروغ میں نمایاں خدمات کی تعریف کی۔ انہوں نے سماجی تنظیموں اور معاشرے کے تمام طبقات سے کہا کہ وہ قدرتی ورثے کے تحفظ میں شامل ہوں۔
ڈی آئی پی آر
