لال قلعہ کار دھماکے میں جاں بحق کشمیری کی لاش گھر پہنچی

سرینگر/۱۹نومبر
دہلی کے لال قلعہ کے نزدیک حالیہ کار دھماکے میں جاں بحق ہونے والے۲۷سالہ بلال احمد سانگو کی میت بدھ کو ان کے آبائی گائوں بابا نگری وانگت کنگن پہنچائی گئی۔
اطلاعات کے مطابق جوں ہی بدھ کو بلال احمد کی میت ان کے آبائی گائوں پہنچی تو وہاں ہر سو ماتم کا ماحول سایہ فگن ہوا اور ان کے احباب و اقارب بالخصوص خواتین کو زار و قطار روتے ہوئے دیکھا گیا۔
انہوں نے کہا کہ بلال احمد کی میت پہنچتے ہی گائوں میں لوگ بڑی تعداد میں جمع ہوئے اور وہاں جذباتی مناظر دیکھے گئے ۔
مقامی ذرائع کے مطابق بلال احمد گذشتہ کئی برسوں سے دہلی میں مزدوری کرتا تھا اور اپنے اہلخانہ کو پالتا پوستا تھا۔
اس موقع پر رکن اسمبلی کنگن میاں ماہر علی نے میڈیا کو بتایا’میں نے پہلے بھی ان کی مدد کی ہے اور آگے بھی کرتا رہوں گا‘۔انہوں نے کہا کہ حکومت متاثرہ کنبے کو ہر ممکن مدد فراہم کرے گی۔ایجنسیز