جموں/۱۷نومبر
جموں ریلوے اسٹیشن پرپیر کی صبح سے سیکورٹی فورسز کی جانب سے سخت اور غیر معمولی تلاشی کارروائیاں جاری ہیں۔
خطے میں ممکنہ سیکورٹی خدشات اور حساس صورتحال کے پیشِ نظر فورسز نے اسٹیشن کے اندر اور باہر حفاظتی دائرہ مزید مضبوط کر دیا ہے ، جبکہ ہر آنے جانے والے مسافر کو سخت جانچ پڑتال سے گزرنا پڑ رہا ہے ۔
نامہ نگار کے مطابق ریلوے اسٹیشن کی تمام داخلی و خارجی گزرگاہوں پر جموں پولیس، ریلوے پروٹیکشن فورس اور سینٹرل ریزرو پولیس فورس کے اہلکار تعینات کر دیے گئے ہیں۔
مسافروں کے سفری بیگ، سوٹ کیس، ہینڈ بیگ اور دیگر سامان کو جدید ایکس رے اسکینرز اور دستی میٹل ڈیٹیکٹر کی مدد سے باریک بینی سے چیک کیا جا رہا ہے ۔ کئی مقامات پر خصوصی تلاشی ٹیمیں بھی تعینات ہیں جو رینڈم چیکنگ کے ذریعے مشکوک مسافروں کی شناخت کر رہی ہیں۔
عینی شاہدین کے مطابق اسٹیشن پر لوگوں کی نقل و حرکت کو منظم رکھنے کے لیے خصوصی لائنیں، رکاوٹیں اور چیک پوائنٹس قائم کیے گئے ہیں۔ مسافروں کو داخلی دروازوں پر لمبی قطاروں میں اپنی باری کا انتظار کرنا پڑا، تاہم انہوں نے سیکورٹی سخت کرنے کے اس اقدام کا خیر مقدم کیا ہے ۔
ذرائع نے بتایا کہ تلاشی مہم کے دوران پولیس نے پلیٹ فارم، ویٹنگ ہال، بکنگ ایریا، ٹکٹ کاؤنٹر، ٹوائلٹس اور پارکنگ زون تک کو کھنگال ڈالا۔
اس کے علاوہ اسٹیشن کے آس پاس کے علاقوں میں بھی ڈاگ اسکواڈ اور بم ڈسپوزل یونٹ کو تعینات کیا گیا ہے تاکہ کسی بھی مشکوک شے یا سرگرمی کا بروقت پتہ لگایا جا سکے ۔
سیکورٹی حکام کا کہنا ہے کہ یہ اقدامات ایک عمومی الرٹ کا حصہ ہیں اور کسی بھی ممکنہ خطرے کو روکنے کا بنیادی مقصد رکھتے ہیں۔
ایک پولیس افسر نے بتایا’’جموں ریلوے اسٹیشن خطے کے اہم ترین ٹرانزٹ پوائنٹس میں سے ہے ۔ ہمیں یقین دہانی کرانی ہے کہ یہاں سے گزرتا ہر فرد محفوظ رہے اور کوئی بھی مشکوک سرگرمی فوراً ہمارے ریڈار پر آجائے ‘‘۔
پولیس نے شہریوں اور مسافروں سے گزارش کی ہے کہ وہ سیکورٹی چیک میں مکمل تعاون کریں اور اگر انہیں کسی جگہ کوئی مشکوک شخص یا مشکوک سامان نظر آئے تو فوراً۱۰۰نمبر یا قریبی پولیس چوکی کے ذریعے اطلاع دیں۔
حکام نے کہا کہ عوام کی بروقت اطلاع کئی بار بڑے سانحات کو روکنے میں فیصلہ کن کردار ادا کرتی ہے ۔
فورسز نے واضح کیا ہے کہ مسافروں کی سہولت کے پیشِ نظر چیکنگ تیز رفتار مگر مؤثر انداز میں کی جا رہی ہے اور اس بات کو یقینی بنایا جا رہا ہے کہ کسی کو غیر ضروری تکلیف نہ ہو۔
دریں اثناسرحدی ضلع پونچھ میں سیکورٹی صورتحال کے پیش نظر پولیس نے پیر کے روز دہشت گردوں یا ان کے مددگاروں کی موجودگی اور نقل و حرکت کے بارے میں مصدقہ اور قابلِ عمل اطلاعات فراہم کرنے والے افراد کیلئے۵لاکھ روپے کے انعام کا باضابطہ اعلان کیا ہے ۔
اس اقدام کو خطے میں جاری انسدادِ دہشت گردی آپریشنز کو مضبوط بنانے کی اہم کڑی قرار دیا جا رہا ہے ۔
پولیس کی جانب سے جاری بیان میں کہا گیا کہ دہشت گردی سے متعلق کسی بھی قسم کی قابل اعتماد اطلاع فراہم کرنے والے شہری کے نام اور شناخت کو مکمل رازداری میں رکھا جائے گا۔
ترجمان نے عوام سے اپیل کی کہ وہ چوکس رہیں اور کسی بھی مشتبہ شخص، مشکوک سرگرمی، دہشت گردوں کو فراہم کی جانے والی مدد یا لاجسٹک سپورٹ کے بارے میں فوراً پولیس سے رابطہ کریں۔
بیان میں مزید کہا گیا کہ دہشت گردوں یا ان کے معاونین کے ٹھکانوں، رسد کے ذرائع، نقل و حرکت، ہتھیاروں کی نقل و حمل یا رابطہ سہولیات سے متعلق کسی بھی اطلاع کو نہایت اہمیت دی جائے گی۔
پولیس نے واضح کیا کہ بروقت اطلاع نہ صرف بڑی وارداتوں کو روکتی ہے بلکہ شہریوں کی جان و مال کے تحفظ میں ایک اہم کردار ادا کرتی ہے ۔
پونچھ پولیس نے عوام کی سہولت کے لیے واٹس ایپ کے خصوصی نمبرز بھی جاری کیے ہیں، جن کے ذریعے لوگ براہ راست کنٹرول روم یا متعلقہ سب ڈویژنل افسروں تک اپنی معلومات پہنچا سکتے ہیں۔
اس کے علاوہ شہری نزدیکی پولیس اسٹیشن، پولیس چوکی یا کسی بھی اہلکار سے بالمشافہ رابطہ کر کے بھی اپنی اطلاعات فراہم کر سکتے ہیں۔
ذرائع کے مطابق پونچھ اور راجوری کے جنگلاتی علاقوں میں گزشتہ چند ہفتوں سے ملی ٹینٹ نقل و حرکت کے ان پٹ مل رہے ہیں، جس کے بعد حفاظتی اقدامات سخت کر دیے گئے ہیں۔
فورسز کی جانب سے جنگلاتی علاقوں، پہاڑی راستوں اور سڑکوں پر گشت میں اضافہ بھی کیا گیا ہے تاکہ کسی بھی قسم کی دراندازی یا دہشت گردانہ سرگرمی کو بروقت ناکام بنایا جا سکے ۔
اعلیٰ سیکورٹی حکام کا کہنا ہے کہ مقامی آبادی کا تعاون دہشت گردی کے خلاف جنگ میں نہایت اہمیت رکھتا ہے ۔ پولیس نے اس بات پر زور دیا کہ دہشت گرد اپنے اہداف کے لیے عام شہریوں کا سہارا لیتے ہیں، اس لیے کسی بھی مشکوک سرگرمی کی فوری اطلاع دینا ایک قومی ذمہ داری ہے ۔
بیان میں عوام کے لیے ایک مرتبہ پھر واضح پیغام دیا گیا کہ پولیس اور دیگر سیکورٹی ادارے ہر سطح پر سرگرم ہیں، تاہم امن کی بحالی اور دہشت گردی کے مکمل خاتمے کے لیے شہریوں کی شمولیت بنیادی ستون کی حیثیت رکھتی ہے ۔ایجنسیز
