عتیق احمد کے گروہ کے قبضے سے آزاد کرائی گئی 48 بیگھہ سرکاری زمین

پریاگ راج، 15 نومبر (یو این آئی) اتر پردیش کے پریاگ راج میں مافیا مرحوم عتیق احمد کے گینگ کے قبضے سے 48 بیگھہ سرکاری زمین کو آزاد کروا لیا گیا ہے ۔
ایئرپورٹ تھانہ علاقے کے نصیر پور سلنہ گاؤں میں عتیق کی گینگ نے سرکاری زمین پر قبضہ کر رکھا تھا، جسے آج ہفتہ کے روز ایس ڈی ایم صدر، ابیشیک کمار کی قیادت میں جاری مہم کے تحت آزاد کرایا گیا۔ اس زمین کو اب گرام سبھا کے نام پر درج کیا جائے گا۔ مافیا عتیق احمد کے گینگ سے آزاد کرائی گئی زمین کی قیمت تقریباً 80 کروڑ روپے بتائی جا رہی ہے ۔
اتر پردیش لینڈ ریفارمز رولز، 1952 کے تحت کارروائی کرتے ہوئے ، ایس ڈی ایم صدر نے نسیر پور سلنہ، پرگنہ اور تحصیل صدر میں موجود 14 گاٹوں کی نشاندہی کی، جن کا مجموعی رقبہ 8.7550 ہیکٹر یعنی کل 38 بیگھہ زمین تھی۔
اس تمام زمین سے پرانے مالکوں کے نام منسوخ کر کے اسے گرام سبھا کے نام پر درج کرایا گیا۔ زمین کو غیر قانونی قبضے سے آزاد کروانے کے بعد تحصیلدار صدر کے ذریعے ریونیو انسپکٹر اور لیکھپال کو زمین کی حفاظت کی ہدایت دی گئی ہے ۔
بتایا جا رہا ہے کہ سرکاری زمین پر عتیق کے قریبی افراد، جن میں امان اللہ، اشتیاق احمد، اقبال احمد، غلام، اخلاق احمد اور محمد بٹنیہ شامل ہیں، کے نام درج تھے ۔ ایس ڈی ایم صدر ابیشیک سنگھ کے مطابق یہ زمین 14 گاٹوں پر مشتمل تھی اور زیادہ سے زیادہ پانچ سال کے لیے دی جاتی ہے ۔ تاہم مافیا نے اس پر غیر قانونی قبضہ کر لیا۔ غیر قانونی قابضین اپنے حق میں کوئی ثبوت پیش نہیں کر سکے ، جس کے بعد زمین کو گرام سبھا کے نام منتقل کر دیا گیا۔ایس ڈی ایم ابیشیک سنگھ کے مطابق مستقبل میں سرکاری زمین پر کسی بھی قسم کے قبضے کی صورت میں سخت کارروائی کی جائے گی۔