دبئی، 15 نومبر (یو این آئی) چار براعظموں کی آٹھ ٹیموں کے درمیان نیا عالمی ٹورنامنٹ ’آئی سی سی ویمن ایمرجنگ نیشنز ٹرافی‘ 20 سے 30 نومبر تک بینکاک میں کھیلا جائے گا۔ اس ٹرافی کے پہلے ایڈیشن میں تھائی لینڈ، پاپوا نیو گنی، نیدرلینڈ، یو اے ای، اسکاٹ لینڈ، نامیبیا، تنزانیہ اور یوگنڈا کی ٹیمیں حصہ لیں گی۔
ابتدائی دن 20 نومبر کو تھائی لینڈ بمقابلہ نیدرلینڈ اور پاپوا نیو گنی بمقابلہ یو اے ای کے میچ کھیلے جائیں گے۔
بین الاقوامی کرکٹ کونسل (آئی سی سی) کی جانب سے جاری بیان میں کہا گیا ہے کہ اس ٹورنامنٹ کا انعقاد حال ہی میں ہندوستان اور سری لنکا میں منعقد ہونے والے ایک روزہ ویمن ورلڈ کپ کی شاندار کامیابی کے بعد عمل میں لایا گیا ہے۔ اس ورلڈ کپ کو ہندوستان میں 50 کروڑ سے زائد شائقین نے دیکھا جبکہ مختلف ممالک میں بھی ناظرین کی تعداد میں نمایاں اضافہ ریکارڈ کیا گیا۔
بیان میں مزید کہا گیا کہ "ہندوستان اور سری لنکا میں تقریباً تین لاکھ شائقین نے اس میگا ایونٹ کو اسٹیڈیم میں بیٹھ کر دیکھا۔ ٹورنامنٹ کا اختتام ہندوستان کے ویمن کرکٹ ورلڈ کپ جیتنے والی پہلی ایشیائی ٹیم بننے کے ساتھ ہوا، جو کھیل کی ترقی اور صنفی کرداروں کے معاشرتی و ثقافتی تناظر میں ایک تاریخی سنگ میل ثابت ہوا۔ اس زبردست کامیابی کے بعد آئی سی سی ویمن کرکٹ کے پائیدار مستقبل کے لیے سرمایہ کاری جاری رکھے ہوئے ہے۔ ویمن ایمرجنگ نیشنز ٹرافی ایک نئے تین درجوں پر مشتمل ترقیاتی نظام کا حصہ ہے جس کا مقصد ابھرتی ہوئی ٹیموں کو اعلیٰ سطح کی کرکٹ کھیلنے کے مواقع فراہم کرنا ہے۔”
آئی سی سی کے چیف ایگزیکٹو آفیسر سنجوگ گپتا نے کہا،”آئی سی سی کے صدر جے شاہ کا مقصد دنیا بھر میں کرکٹ کو مستقل طور پر فروغ دینا اور خواتین کے کھیل کو مضبوط بنانا ہے۔ ابھرتے ہوئے ممالک کی باصلاحیت کھلاڑیوں کو اعلیٰ سطح پر کھیلنے کے زیادہ مواقع فراہم کرنے سے ان کی ترقی کی رفتار تیز ہوگی اور ان کی ٹیموں کی مسابقتی صلاحیت میں اضافہ ہوگا۔”
انہوں نے مزید کہا،”یہ ٹورنامنٹ شریک ممالک میں کھیل کی مقبولیت بڑھانے میں بھی اہم کردار ادا کرے گا، لڑکیوں کو کھیلوں میں شمولیت کی ترغیب دے گا اور دیگر ممالک کی خواتین کو مسلسل ترقی کی راہ پر گامزن رہنے کی حوصلہ افزائی کرے گا۔”
