شی جن پنگ نے روسی وزیر اعظم میخائل میشوسٹن سے ملاقات کی

بیجنگ، 4 نومبر (یو این آئی) چین کے صدر شی جن پنگ نے منگل کو یہاں روس کے وزیر اعظم میخائل میشوسٹن سے ملاقات کی اور دونوں ممالک کے درمیان مختلف شعبوں میں تعاون کو مزید مضبوط بنانے اور ترقیاتی حکمت عملیوں کو بہتر طور پر مربوط کرنے پر اتفاق کیا۔
مسٹر جن پنگ نے کہا کہ اس سال کے آغاز سے چین اور روس نے پیچیدہ بین الاقوامی ماحول کے باوجود مضبوطی اور تحمل کے ساتھ آگے بڑھتے ہوئے اعلیٰ سطحی اور اعلیٰ معیار کے ترقیاتی اہداف کو حاصل کیا ہے ۔ انہوں نے زور دے کر کہا کہ دونوں ممالک دو طرفہ تعلقات کو برقرار رکھنے ، مضبوط بنانے اور آگے بڑھانے پر متفق ہیں۔
چینی صدر نے یہ بھی ذکر کیا کہ اس سال روسی صدر ولادیمیر پوتن کے ساتھ ان کی ملاقاتوں کے دوران دونوں ممالک کے درمیان تعلقات کے لیے نئے روڈ میپ تیار کیے گئے ۔ انہوں نے کہا کہ چین اور روس کو باہمی ہم آہنگی برقرار رکھتے ہوئے رہنماؤں کے درمیان طے پانے والے اہم اتفاق رائے کو مکمل طور پر نافذ کرنا چاہیے ۔ مزید برآں، دونوں ممالک کو اپنے بنیادی مفادات اور اپنے عوام کی فلاح و بہبود کو مدنظر رکھتے ہوئے تعاون کے دائرہ کار کو مزید وسعت دینا چاہیے ، تاکہ عالمی امن اور ترقی میں زیادہ سے زیادہ حصہ ڈالا جا سکے ۔