کانگریس اور این سی ممبران اسمبلی کا احتجاج، معراج ملک کی رہائی کا مطالبہ

سرینگر/۲۳؍اکتوبر
جموں کشمیر قانون ساز اسمبلی کے اجلاس کے آغاز سے قبل جمعرات کے روز نیشنل کانفرنس (این سی) اور کانگریس کے متعدد اراکینِ اسمبلی نے ڈوڈہ سے منتخب ایم ایل اے معراج ملک کی رہائی کے حق میں پرامن احتجاج کیا۔
یو این آئی نامہ نگار کے مطابق صبح کے وقت اسمبلی ہال کے باہر نیشنل کانفرنس، کانگریس اور دیگر جماعتوں سے وابستہ کئی اراکین نے پلے کارڈز اٹھا رکھے تھے جن پر لکھا تھا: ’معراج ملک کو رہا کرو اور سیاسی انتقام بند کرو۔
ذرائع نے بتایا کہ احتجاج ایوان کے آغاز سے قبل اسمبلی کمپلیکس کے مرکزی دروازے پر کیا گیا، جہاں اراکین نے نعرے بازی کے بغیر خاموش مظاہرہ کرتے ہوئے پارٹی قیادت کے ہمراہ حکومت سے فوری رہائی کا مطالبہ کیا۔
قابل ذکر ہے کہ ڈوڈہ سے ایم ایل اے معراج ملک کو کچھ ماہ قبل پبلک سیفٹی ایکٹ کے تحت حراست میں لیا گیا تھا اور اس وقت وہ کٹھوعہ سینٹرل جیل میں مقید ہیں۔
نیشنل کانفرنس کے ایک سینئر رکن نے میڈیا سے گفتگو میں کہا ’’یہ ایک منتخب عوامی نمائندے کی غیر منصفانہ گرفتاری ہے۔ معراج ملک کی آواز کو دبانا جمہوری عمل کے خلاف ہے۔ ہم ایوان کے اندر اور باہر ان کی رہائی کے لیے آواز بلند کرتے رہیں گے‘‘۔
کانگریس کے ایک رکن نے کہا کہ:’ایک عوامی نمائندے کو بغیر عدالتی کارروائی کے جیل میں رکھنا جمہوریت کے اصولوں کے منافی ہے۔ حکومت کو فوراً ان کی رہائی یقینی بنانی چاہیے۔ایجنسیز‘