انگلش پریمیئر لیگ :آرسنل نے لیگ میں پہلی فتح سمیٹ لی

لندن 29 ستمبر(یو این آئی ) آرسنل نے انگلش پریمیئر لیگ کے ایک میچ میں نیوکیسل یونائیٹڈکو شکست دے دی جبکہ آسٹن ولا کی ٹیم نے فلہم کو1-3 گول سے ہرا کر لیگ میں پہلی فتح سمیٹ لی ۔امریکی ویب سائٹ ای ایس پی این کے مطابق انگلش پریمیئر فٹ بال لیگ کا 34 واں سیزن انگلینڈ میں جاری ہے جس میں شائقین فٹ بال کو انتہائی دلچسپ اور کانٹے دار مقابلے دیکھنے کو مل رہے ہیں۔
سینٹ جیمز پارک، نیو کیسل اپون ٹائن کے مقام پر کھیلے گئے لیگ کے اہم میچ میں آرسنل اور نیو کیسل یونائیٹڈکی ٹیمیں آمنے سامنے تھیں جس میں آرسنل کی ٹیم نے انتہائی سخت مقابلے کے بعد نیوکیسل یونائیٹڈکو ایک کے مقابلے میں 2 گول سے ہرا دیا۔آرسنل کی جانب سے میکل میرینونے میچ کے 84ویں اور گیبریل میگلہیس نے میچ کےآخری لمحات میں گول کر کے اپنی ٹیم کو فتح دلائی ۔
یہ آرسنل کی لیگ میں چوتھی فتح ہے اور وہ 13 پوائنٹس کے ساتھ ٹیبل پر دوسری پوزیشن پر پہنچ گئی ہے،آرسنل کی ٹیم نے نہ صرف نیوکیسل یونائیٹڈ کے خلاف میچ میں فتح حاصل کی بلکہ اس سے ٹیبل پر دوسری پوزیشن بھی چھن لی ہے۔نیوکیسل یونائیٹڈ کی جانب سے واحد گول نک وولٹیمیڈ نے سکور کیا۔ ولا پارک، برمنگھم کے مقام پر کھیلے گئے ایک اور میچ میں آسٹن ولا اور فلہم کی ٹیمیں نبردآزما تھی جس میں آسٹن ولا کی ٹیم نے نمایاں کارکردگی کا مظاہرہ کرتے ہوئے فلہم کی ٹیم کو ایک کے مقابلے میں 3 گول سے ہرا دیا۔
اس فتح کے ساتھ آسٹن ولا کی ٹیم میں لیگ میں پہلی فتح بھی سمیٹ لی۔اولی واٹکنز،جان میک گین اور ایمیلیانو بوینڈیا نے ایک، ایک گول کر کے آسٹن ولا کی فتح میں اہم کردار ادا کیا۔ فلہم کی طرف سے واحد گول راؤل جمینیز نے سکورکیا۔ دفاعی چیمپئن لیورپول کی ٹیم سب سے زیادہ 15 پوائنٹس کے ساتھ ٹاپ پوزیشن پر برقرار ہے۔