91 ممالک کے 150 مقامات پر ’’وِکست بھارت دوڑ-2025‘‘ کا انعقاد

نئی دہلی، 25 ستمبر (یواین آئی) قوم کی تعمیر کے لیے اجتماعی کوشش کی ترغیب دینے کے مقصد سے پہلی بار 91 ممالک کے 150 مقامات پر وِکست بھارت دوڑ-2025 کا انعقاد کیا جائے گا۔
نوجوان امور اور کھیل کی وزارت، وزارتِ خارجہ کے تعاون سے، سیوا پکھواڑا (17 ستمبر سے 2 اکتوبر) کے حصے کے طور پر 91 ممالک میں 150 سے زیادہ مقامات پر وِکست بھارت رَن-2025 کا اہتمام کر رہی ہے۔ ملک کی تعمیر کے لیے اجتماعی کوشش کی حوصلہ افزائی کرنے کی یہ منفرد عالمی پہل پہلی بار شروع کی جا رہی ہے۔
’رن ٹو سرو دی نیشن‘ کے نعرے کے ساتھ، وِکست بھارت رَن دنیا بھر کے معروف اور قابل رسائی مقامات پر تین سے پانچ کلومیٹر کی کمیونٹی دوڑ کے طور پر منعقد کی جا رہی ہے۔ زیادہ تر دوڑیں 28 ستمبر 2025 کو ہوں گی۔
اس دوڑ میں میکسیکو سٹی کے اینجل آف انڈیپنڈنس، سورینام کے پاراماریبو میں یونیسکو عالمی ورثہ مقام، سین فرانسسکو کے گولڈن گیٹ برج اور دنیا بھر کے کئی دیگر معروف مقامات و تاریخی یادگاریں شامل ہوں گی۔ اس کا مقصد بیرونِ ملک مقیم ہندوستانیوں ، مقامی برادریوں، طلبہ، پیشہ ور افراد اور ہندوستان کے دوستوں کو ایک پلیٹ فارم پر اکٹھا کرنا ہے، تاکہ سال 2047 تک ’وکست بھارت‘ کے وژن کے لیے ان کی وابستگی کو مضبوط اور نمایاں کیا جا سکے۔