اتراکھنڈ ایس ٹی ایف نے سورت سے سائبر مجرم کو گرفتار کیا

دہرادون، 20 ستمبر (یو این آئی) اتراکھنڈ پولیس کی اسپیشل ٹاسک فورس (ایس ٹی ایف) کی سائبر کرائم ونگ نے گوگل پر جعلی بینکنگ کسٹمر کیئر نمبر کے ذریعے 14.08 لاکھ روپے کی دھوکہ دہی کرنے والے ملزم کو گجرات کے سورت سے گرفتار کرلیا۔
ایس ٹی ایف کے سینئر سپرنٹنڈنٹ آف پولیس (ایس ایس پی) نوینت سنگھ بھلر نے ہفتہ کے روز بتایا کہ ملزم گوگل پر فرضی بینک کسٹمر کیئر نمبر اپ لوڈ کر کے گاہکوں کو نشانہ بناتا تھا۔ اس نے 2021 میں دہرادون کے ایک شہری کو خود کو پنجاب نیشنل بینک کا افسر ظاہر کرتے ہوئے آن لائن شکایت درج کرانے کے بہانے لنک اور واٹس ایپ کے ذریعے بینک تفصیلات اور او ٹی پی حاصل کیے ۔ بعد ازاں ان معلومات کا غلط استعمال کرتے ہوئے متاثرہ کے اکاؤنٹ سے کل 14 لاکھ 8 ہزار 800 روپے مختلف کھاتوں میں منتقل کر دیے گئے ۔ متاثرہ نے اس واقعے کی شکایت دہرادون سائبر کرائم تھانے میں درج کرائی۔
مسٹر بھلر نے بتایا کہ معاملے کی تحقیقات کے بعد ایس ٹی ایف نے ملزم کے خلاف شواہد ملنے پر عدالت میں چارج شیٹ داخل کی تھی، جس پر عدالت نے غیر ضمانتی وارنٹ جاری کیا۔ بعد ازاں سائبر کرائم پولیس ٹیم نے تکنیکی نگرانی اور مسلسل چھان بین کے ذریعے مرکزی ملزم مورادیا ہاردک کمار بھگوان بھائی ولد بھگوان بھائی مورادیا، ساکن، مکان نمبر 736، سورگ ریذیڈنسی، اتودرا، اولپاڈ، چوک بازار، سورت (گجرات) کو گرفتار کر لیا۔ انہوں نے بتایا کہ گرفتار ملزم کو عدالت میں پیش کر کے تعزیرات ہند کی متعلقہ دفعات کے تحت مزید تفتیش کی جا رہی ہے ۔