ہندوستان کا لسانی تنوع اس کی سب سے بڑی طاقت ہے:ایل جی سنہا

سرینگر/۱۹ ستمبر
لیفٹیننٹ گورنر منوج سنہا نے کہا ہے کہ امن و استحکام، اتحاد و یکجہتی، مشترکہ مقاصد اور مضبوط اجتماعی شناخت کے ذریعے ہی ہندوستان تیز رفتار اور مضبوط ترقی حاصل کرے گا۔
سنہا جمعہ کو نیشنل انسٹی ٹیوٹ آف ٹیکنالوجی سرینگر اور بھارتیہ بھاشا سمیتی کے اشتراک سے منعقدہ ’’ہندوستانی زبانوں میں انضمام‘‘ سے متعلق قومی سیمینار سے خطاب کر رہے تھے۔
لیفٹیننٹ گورنر نے اپنے خطاب میں کہا کہ ہندوستان کا لسانی تنوع اس کی سب سے بڑی طاقت ہے۔ انہوں نے کہا کہ سینکڑوں زبانوں اور بولیوں نے ایک ایسے مربوط سماج کی بنیاد رکھی ہے جو تبدیلی اور ترقی کی راہ ہموار کر رہا ہے۔
ایل جی نے کہا کہ مختلف پس منظر، زبانوں، بولیوں اور خیالات کے باوجود ایک مشترکہ قومی شعور اور شناخت ہمیں یکجا کرتی ہے۔ انہوں نے زور دیا کہ ملک کی تعمیر کے لیے ہمیں ’’تنوع میں اتحاد‘‘ کی طاقت کو استعمال میں لانا ہوگا۔ ان کے مطابق، ہندی زبان کو ایک ایسے پل کا کردار ادا کرتے رہنا چاہیے جو مختلف لسانی طبقات کو جوڑے، عوام کو دوسری زبانیں سیکھنے کی ترغیب دے، باہمی تعاون کو بڑھائے اور معاشی انضمام کی راہ ہموار کرے۔
سنہا نے اس بات پر بھی زور دیا کہ معاشرے کے تمام طبقات کو ہندوستانی زبانوں میں پوشیدہ مالا مال ثقافتی ورثے کو محفوظ اور فروغ دینے کے لیے آگے آنا چاہیے۔ انہوں نے نوجوانوں پر زور دیا کہ وہ لسانی اختلافات سے بالاتر ہوکر قوم کو متحد کریں اور ملک کو ’’وِکسِت بھارت‘‘ میں تبدیل کرنے کے لیے عملی کردار ادا کریں۔
ایل جی نے کہا ’’ہمیں ایک شاندار اور ترقی یافتہ ہندوستان تخلیق کرنا ہے، جس کیلئے لازمی ہے کہ نوآبادیاتی ذہنیت کے ہر نشان کو مکمل طور پر ختم کیا جائے‘‘۔
لیفٹیننٹ گورنر نے اس اعتماد کا اظہار کیا کہ پوری دنیا مستقبل کے امکانات کے حوالے سے ہندوستان کی طرف دیکھ رہی ہے۔ ان کے بقول ’’اکیسویں صدی ہندوستان کی صدی ہے۔ یہ ایک طے شدہ حقیقت ہے۔ مستقل ترقی اور بڑھتی ہوئی پیداواریت ہندوستان کو ایک غالب عالمی طاقت میں تبدیل کرے گی۔‘‘
سنہا نے نوجوان طلبہ کو نصیحت کی کہ وہ نئی زبانیں سیکھیں، اپنی سوچ کو وسیع کریں اور جدت پسندی کو اپنائیں تاکہ عالمی سطح پر نمایاں کردار ادا کر سکیں۔
ایل جی نے این آئی ٹی سرینگر کی جانب سے آفیشل لینگویج سیل کے قیام اور ہندی زبان کے فروغ کے لیے سرگرم کوششوں کو سراہا۔
اس موقع پر لیفٹیننٹ گورنر نے مختلف زبانوں کے فروغ میں نمایاں خدمات انجام دینے والے ادیبوں، محققین اور علما کو اعزازات سے نوازا۔
تقریب میں شکشا سنسکرتی اْتھان نیاس کے نیشنل سکریٹری شری اتل بھائی کوٹھاری، این آئی ٹی سرینگر کے ڈائریکٹر پروفیسر بِنود کمار کنوجیا، ڈویڑنل کمشنر کشمیر ‘انشل گرگ، ایس ایس پی سرینگر ڈاکٹر جی وی سندیپ چکرورتی، شکشا سنسکرتی اْتھان نیاس کے اراکین، ممتاز ادبی شخصیات، علما، اساتذہ اور طلبہ کی بڑی تعداد موجود تھی۔