مغربی بنگال: طالبہ کے قتل معاملے میں مقامی لوگوں نے ہیڈ ماسٹر کی پٹائی کی

کولکتہ، 18 ستمبر (یو این آئی) مغربی بنگال، ندیا ضلع کے رام پورہاٹ کے جنگلا تی علاقے سے ایک طالبہ کی لاش ملنے کے ایک دن بعد جمعرات کی صبح ایک نیا تنازعہ شروع ہوگیا، جب ناراض مقامی لوگوں نے شیام پہاڑی شری رام کرشن ودیاپیٹھ کے ہیڈ ماسٹر پر حملہ کر دیا۔
طلبہ تنظیم نے ہیڈ ماسٹر پر الزام لگایا کہ انہوں نے استاد منوج کمار پال کے خلاف شکایات کو نظر انداز کیا، جنہیں ساتویں جماعت کی طالبہ کی عصمت دری اور قتل کے الزام میں گرفتار کیا گیا ہے ۔
عینی شاہدین کے مطابق مقامی لوگ اسکول کے احاطے میں داخل ہو گئے اور ہیڈ ماسٹر کو باہر گھسیٹا اور بری طرح مارا پیٹا۔ اس مار پیٹ میں ان کے کپڑے بھی پھٹ گئے ۔ جب پولیس نے مداخلت کرنے کی کوشش کی، تو مشتعل دیہی باشندوں نے پولیس پر بھی پتھراؤ کر دیا اور پولیس کی گاڑی کو نقصان پہنچایا۔بعد میں اضافی پولیس فورس نے ہیڈ ماسٹر کو بچایا اور محفوظ مقام پر پہنچایا۔
مقامی لوگوں نے الزام لگایا کہ ہیڈ ماسٹر کواستاد پال کے رویے کے بارے میں پہلے سے معلوم تھا، لیکن کارروائی کرنے کے بجائے انہوں نے اسے بچانے کی کوشش کی۔مقامی افراد نے دعویٰ کیا ہے کہ ”اگر انہوں نے پہلے کارروائی کی ہوتی تو لڑکی بچ سکتی تھی”۔
یہ کشیدگی ایک 13 سالہ قبائلی طالبہ کے بہیمانہ قتل کے بعد پیدا ہوئی، جس کی سڑی گلی لاش کل رام پورہاٹ تھانہ علاقے کے کُللاکاٹا گاؤں کے قریب ایک جنگل سے ملی تھی۔بارومیسیا گاؤں کی رہنے والی متاثرہ 28 اگست کو نجی ٹیوشن کے لیے گھر سے نکلی تھی اور اس کے بعد لاپتہ ہو گئی تھی۔ دیہی باشندوں نے بوری میں اس کی لاش دیکھ کر پولیس کو اطلاع دی، اور بعد میں گھر والوں نے لاش کی شناخت کی۔
پولیس نے کل شام اسکول کے فزکس کے استاد منوج کمار پال کو اس جرم کے سلسلے میں گرفتار کر لیا۔ تفتیش کے دوران پال نے اعتراف کیا کہ لڑکی نے اس کی پیشکش ٹھکرا دی تھی، جس پر اس نے اسے قتل کر دیا۔
متاثرہ کے پڑوسیوں نے دعویٰ کیا کہ وہ اسے مہینوں سے ہراساں کر رہا تھا، اکثر اس کے بارے میں پوچھتا رہتا تھا، اور یہاں تک کہ شادی کی پیشکش بھی کی تھی۔