ممبر اسمبلی سمیت متعدد وفود کی ایل جی سنہا سے ملاقات

سرینگر/۱۸ ستمبر
جموںکشمیر کے لیفٹیننٹ گورنر‘ منوج سنہا سے آج راج بھون میں ممبر اسمبلی کے علاوہ متعدد وفود نے ملاقات کی اورمختلف امورات پر ان سے بات کی ۔
راج بھون کے ایک ترجمان کے مطابق بسوہلی سے ممبر اسمبلی‘ درشن کمار نے آج منوج سنہا سے ملاقات کی۔انہوں نے لیفٹیننٹ گورنر کو حالیہ سیلاب اور شدید بارشوں سے متاثرہ سڑکوں کے بنیادی ڈھانچے کی بحالی اور متاثرہ خاندانوں کی فلاح و بہبود کے مسائل سے آگاہ کیا۔
ترجمان کے مطابق بی کے پورہ، بڈگام سے ڈی ڈی سی ممبر صائمہ جان اور فرصل، کولگام سے عنایت اللہ راٹھ بھی آج لیفٹیننٹ گورنر شری منوج سنہا سے ملے۔
اس کے بعد نیشنلسٹ کانگریس پارٹی ( شرد چندر پوار) کے نیشنل جنرل سیکرٹری‘ کے کے شرما کی قیادت میں ایک وفد اور مگام سول سوسائٹی کے اراکین نے بھی لیفٹیننٹ گورنر سے ملاقات کی۔
اکھل بھارتیہ ودیارتھی پریشد (اے بی وی پی) جموں کشمیر یونٹ کا ایک وفد بھی آج لیفٹیننٹ سے ملا اور یونین ٹیریٹری میں حالیہ قدرتی آفات کے پیش نظر جموں و کشمیر پبلک سروس کمیشن امتحانات کو دوبارہ شیڈول کرنے کا مطالبہ رکھا۔
اتل بھائی کوٹھاری، نیشنل سیکرٹری شکشا سنسکرتی اتھان نیاس نے بھی آج لیفٹیننٹ گورنر شری منوج سنہا سے ملاقات کی۔ ان کے ہمراہ شکشا سنسکرتی اتھان نیاس کے عہدیداران اور جموں کشمیر کی مختلف یونیورسٹیوں کے فیکلٹی ممبران بھی موجود تھے۔
خواتین کے حقوق کی کارکن‘ عرفانہ زرگر، جو وادی میں ’پیڈ وومن آف کشمیر‘کے نام سے مشہور ہیں، نے بھی آج لیفٹیننٹ گورنر شری منوج سنہا سے ملاقات کی۔
زرگر نے وادی میں خواتین کے بااختیار بنانے کے لیے جاری اپنی سرگرمیوں کے بارے میں لیفٹیننٹ گورنر کو آگاہ کیا۔ڈی پی آئی آر