بڈگام، کٹرہ کے درمیان ۱۵دنوں تک خصوصی ٹرین چلائی جائیگی: حکام

بڈگام/۱۸ ستمبر
ریلوے حکام نے جمعرات کو اعلان کیا کہ واسٹوڈوم خصوصی ٹرین اگلے۱۵ دنوں تک بڈگام سے کٹرہ کے درمیان چلائی جائے گی۔
ایک عہدیدار نے کہا کہ حالیہ کچھ ایام میں خراب موسمی حالات کی وجہ سے جموں،سرینگر نیشنل ہائی وے کی بار باربندش کے پیش نظر، ٹرین نمبر۷۴۶۸۸ واسٹوڈوم اسپیشل آئندہ ۱۵ دنوں تک چلے گی۔
حکام نے کہا کہ یہ فیصلہ مقامی مسافروں کی سہولت کے لیے کیا گیا ہے جو شاہراہ کی بندش کی وجہ سے مشکلات کا سامنا کر رہے ہیں۔
ایک عہدیدار نے بتایا کہ خصوصی سروس اس مدت کے دوران لوگوں کو سفر کے لیے ایک متبادل سہولت فراہم کرے گی۔
انہوں نے مزید کہا کہ اس روٹ پر سفر کی طلب کو پورا کرنے اور ٹرین کی روانی کو یقینی بنانے کے لیے ضروری انتظامات کیے جا رہے ہیں۔