اننت ناگ میں نارکو، ٹیرر کیس میں غیر منقولہ جائیداد منسلک

سرینگر/۱۸ستمبر
غیر قانونی سرگرمیوں میں ملوث افراد کے خلاف ایک اہم کارروائی میں جموں و کشمیر پولیس نے نارکو ٹیرر کے ایک کیس میں جنوبی کشمیر کے ضلع اننت ناگ میں غیر منقولہ جائیداد منسلک کر دی۔
ایک پولیس ترجمان نے اپنے ایک بیان میں کہا کہ اننت ناگ پولیس نے نارکو ـ ٹیرر کیس میں غیر منقولہ جائیداد منسلک کر دی۔
ترجمان نے کہا کہ یہ جائیداد پولیس اسٹیشن مٹن میں درج ایف آئی آر نمبر۲۰۲۵/۵۷کے تحت منسلک کر دی گئی۔
ان کا کہنا ہے کہ یہ مقدمہ انڈین آرمز ایکٹ کی متعلقہ دفعات اور این ڈی پی ایس ایکٹ کی متعلقہ دفعات کے تحت درج کیا گیا تھا۔
پولیس ترجمان نے بتایا کہ منسلک کی گئی جائدیاد۳کنال اور۶مرلہ اراضی پر مشتمل ہے جو خسرہ نمبر ۲۸۳‘ کھیوٹ نمبر ۱۶؍اور کھاتہ نمبر ۱۱۵کے تحت آتی ہے ۔
ترجمان نے کہا کہ یہ زمین سنگم بجبہاڑہ میں واقع ہے اور اقرا مشتاق دختر مشتاق احمد ڈار ساکن ہوگام سری گفوارہ اننت ناگ کے نام رجسٹر ہے ۔
ان کا کہنا ہے کہ اقرا مشتاق ملزم فردوس احمد بٹ کی بھانجی ہے ۔
بیان میں کہا گیا کہ یہ کارروائی قانونی طریقہ کار کے تحت انجام دی گئی اور یہ ان افراد اور جائیدادوں کے خلاف جاری کریک ڈائون کا حصہ ہے جو غیر قانونی اور ملک دشمن سرگرمیوں میں ملوث ہیں۔
ادھرمنشیات کے خلاف کریک ڈاؤن میں ایک اہم کامیابی حاصل کرتے ہوئے جموں وکشمیر پولیس نے جموں میں دو منشیات فروشوں کو گرفتار کرکے ان کی تحویل سے ہیروئن جیسا ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ ایک مصدقہ اطلاع پر کارروائی کرتے ہوئے پولیس اسٹیشن بشناہ کی ایک پارٹی نے چک ابارتہ میں ایک ناکہ لگا دیا۔
انہوں نے کہا اس دوران دو افراد کو دھر لیا گیا اور تلاشی کے دوران ان کی تحویل سے۲۶۴گرام ہیروئن جیسا ممنوعہ مواد بر آمد کیا گیا اور ایک موٹر سائیکل بھی ضبط کی گئی۔
گرفتار شدہ ملزموں کی شناخت پارس ولد پورن سنگھ ساکن قاسم نگر حال نئی بستی جموں اور ونود کلوترا ولد جوگندر کمار ساکن چک جالرہ بشناہ کے طور پر ہوئی ہے ۔
بیان میں کہا گیا کہ اس ضمن میں پولیس اسٹیشن بشناہ میں این ڈی پی ایس ایکٹ کے تحت زیر ایف آئی آر نمبر۲۰۲۵/۱۰۲ایک مقدمہ درج کیا گیا اور مزید تحقیقات شروع کی گئی۔ انہوں نے کہا کہ اس کیس میں مزید کامیابیاں متوقع ہیں۔
جموں پولیس نے لوگوں سے منشیات کے متعلق سرگرمیوں کے متعلق اطلاع دینے کی اپیل کی ہے ۔ایجنسیز