انٹرپول کے تعاون سے سی بی آئی نے مفرور منور خان کو کویت سے گرفتار کرلیا

نئی دہلی، 11 ستمبر (یو این آئی) مرکزی تفتیشی ایجنسی (سی بی آئی) نے جرائم کی روک تھام سے متعلق بین الاقوامی تنظیم (انٹرپول) کے تعاون سے ایک بڑی کامیابی حاصل کرتے ہوئے طویل عرصے سے مطلوب مفرور منور خان کو کویت سے ہندوستان واپس لانے میں کامیابی حاصل کی ہے ۔ ملزم پر سازش، دھوکہ دہی اور جعلسازی جیسے سنگین الزامات ہیں۔
سی بی آئی کی بین الاقوامی پولیس سپورٹ یونٹ (آئی پی سی یو) نے وزارت خارجہ اور کویت کی نیشنل کرائم برانچ کے تعاون سے اس کارروائی کو انجام دیا۔ منور خان کو کویت پولیس کی نگرانی میں 11 ستمبر کو حیدرآباد کے راجیو گاندھی انٹرنیشنل ایئرپورٹ پر لایا گیا، جہاں سی بی آئی کی اسپیشل کرائم برانچ، چنئی کی ٹیم نے اسے حراست میں لے لیا۔
سی بی آئی کے مطابق منور خان پر الزام ہے کہ اس نے دیگر شریک ملزمان کے ساتھ مل کر بینک آف بڑودہ سے کروڑوں روپے کی ٹھگی کی تھی۔ دھوکہ دہی کے فوراً بعد وہ کویت فرار ہوگیا اور عدالت نے اسے اشتہاری مجرم قرار دے دیا تھا۔
سی بی آئی کی درخواست پر انٹرپول نے 7 فروری 2022 کو منور خان کے خلاف ریڈ نوٹس جاری کیا تھا۔ اسی بنیاد پر کویت میں اس کی گرفتاری عمل میں آئی اور پھر اسے ہندوستان کے حوالے کرنے کا فیصلہ کیا گیا۔