دبئی، 11 ستمبر (یواین آئی) متحدہ عرب امارات (یو اے ای) کے خلاف میچ میں تین وکٹیں لینے والے ہندوستانی آل راؤنڈر شیوم دوبے نے کہا ہے کہ آل راؤنڈر ہونے کے ناطے میں میچ میں گیندبازی کے لیے ہمیشہ تیار رہتا ہوں۔
دوبے نے یو اے ای کے خلاف جیت کے بعد پریس کانفرنس میں کہا، "آج مجھے ایک اچھی شروعات ملی ہے اور یہ بہت اہم تھا۔ ایک آل راؤنڈر کے طور پر، میں ہمیشہ چار اوورز کرانے کے لیے تیار رہتا ہوں، جب بھی تین سے چار اوورز کرانے کا موقع ملے گا، میں اس کے لیے تیار ہوں۔ ٹیم کو جو بھی ضرورت ہو گی، میں کروں گا۔ کپتان اور کوچ نے پہلے ہی کہا تھا کہ میں (ایشیا کپ میں) گیندبازی کروں گا۔ میرے گیندبازی کوچ مورنے مورکل نے مجھے بہت کچھ سکھایا ہے۔ میں بہت دنوں سے تیاری کر رہا تھا کہ جب بھی موقع ملے گا، میں تیار ہوں۔ آج کا نتیجہ اسی تیاری کا صلہ ہے۔ دوبے نے اعتراف کیا کہ چنئی سپر کنگز (سی ایس کے) میں آئی پی ایل کے دوران، ان کا کردار زیادہ تر پاور ہٹر کا رہا ہے، لیکن انہوں نے اپنی گیند بازی پر بھی مسلسل کام کیا ہے۔ امپیکٹ پلیئر رول پر، دوبے نے کہا، "اس کا جواب سوال میں ہی مضمر ہے۔ ایک آل راؤنڈر کا کردار کم ہو گیا ہے۔ اس لیے میرے لیے آئی پی ایل میں گیندبازی کرنا ضروری نہیں رہا۔ لیکن اپنی طرف سے، میں ہمیشہ تیار تھا۔ میں ہر میچ میں گیندبازی کے لیے تیاررہتا تھا۔ آئی پی ایل سے پہلے بھی میں نے اپنی فٹنس اور گیندبازی پر دو ماہ تک محنت کی ہے۔”
دوبے نے اپنے ایکشن اور ایپروچ کو نکھارنے کا کریڈٹ مورکل کو دیا۔ پریکٹس سیشنز میں دونوں مسلسل بات کرتے رہے ہیں۔ مورکل نے حال ہی میں کہا تھا کہ دباؤ میں بولنگ کرنے کے لیے دوبے جیسے کھلاڑی کو اعتماد دینا بہت ضروری ہے۔ انہوں نے کہا، "انگلینڈ سیریز (جنوری-فروری) میں انہوں نے مجھے کچھ باتیں بتائی تھیں۔ انہوں نے کہا تھا کہ وائیڈ لائن سے گیند ڈالو۔ کچھ گیندوں کو اینگل کا استعمال کرتے ہوئے کم رفتار سے ڈالو۔ انہوں نے رن اپ پر بھی کام کرنے کا مشورہ دیاتھا۔ یہ 2-3 چیزیں میری گیندبازی کو بہتر کررہی ہیں۔ میں نے اپنی رفتار بھی بڑھائی ہے۔
انہوں نے اپنی بلے بازی پر بھی اتنی ہی توجہ دی ہے اور محنت کی ہے۔ آئی پی ایل 2025 اور اب کے درمیان، انہوں نے ممبئی میں کافی مشق کی۔ انہوں نے تیز باؤنسر اور جسم پر آنے والی گیندوں سے نمٹنے پر کام کیا۔ ایشیا کپ کا پہلا میچ آئی پی ایل کے بعد ان کا پہلا بڑا میچ تھا۔ انہوں نے کہا، "میں اپنی بیٹنگ میں کچھ نئے شاٹس شامل کرنے کی کوشش کر رہا تھا۔ میں کچھ جگہوں پر کچھ شاٹس آسانی سے مار سکتا ہوں، لیکن تیز گیند باز مجھے شارٹ بال سے نشانہ بناتے ہیں۔ میں نے آئی پی ایل میں اور اس کے بعد بھی اس پر بہت محنت کی ہے۔ اس کے ساتھ میں اپنی فٹنس پر بھی توجہ دے رہا تھا۔”
ہاردک پانڈیا کے ساتھ موازنہ کے سوال کے جواب میں انہوں نے کہا کہ "ہاردک میرے لیے ایک بھائی کی طرح ہیں۔ ان کے پاس بین الاقوامی اور آئی پی ایل کا کافی تجربہ ہے۔ میں نے ان سے بیٹنگ اور بولنگ دونوں میں بہت کچھ سیکھا ہے، میں نے کبھی ان سے اپنا موازنہ نہیں کیا۔ میں نے صرف یہ سوچا ہے کہ ان سے کچھ سیکھ کر میں خود کو بہتر بنا سکتا ہوں”۔
