آئی سی سی کی نئی ٹیسٹ رینکنگ میں بابر اعظم کی ترقی

لندن /۱۶مارچ//
آئی سی سی کی نئی ٹیسٹ پلیئر رینکنگ میں آسٹریلیا کے مارنوس لبو شین کا پہلا نمبر برقرار ہے، بابر اعظم ایک درجے ترقی کے ساتھ آٹھویں نمبر پر پہنچ گئے، بولرز میں آسٹریلیا کے پیٹ کمنز اور آل راونڈرز میں ویسٹ انڈیز کے جیسن ہولڈر کی پہلی پوزیشن ہے۔
آئی سی سی نے ٹیسٹ پلیئر رینکنگ جاری کی ہے، جس میں آسٹریلیا کے مارنوس لبوشین پہلے انگلینڈ کے جو روٹ دوسرے اور آسٹریلیا کے اسٹیو اسمتھ تیسرے نمبر پر ہیں۔
پاکستان کے بابر اعظم ایک درجے ترقی کے ساتھ آٹھویں نمبر اور ویرات کوہلی ایک درجے تنزلی کے بعد نویں نمبرپر چلے گئے ہیں جبکہ اظہر علی کا 12 واں نمبر برقرار ہے۔
بولنگ میں آسٹریلیا کے پیٹ کمنز کا پہلا، بھارت کے روی چندرن ایشون کا دوسرا نمبر ہے پاکستانی فاسٹ بولر شاہین آفریدی ایک درجے تنزلی کے بعد پانچویں نمبر پر چلے گئے ہیں۔
آل راؤنڈرز کی فہرست میں ویسٹ انڈیز کے جیسن ہولڈر نے رویندرا جڈیجا سے پہلی پوزیشن چھین لی ہے۔