ٹرمپ نے امریکہ-جاپان تجارتی معاہدے پر عمل درآمد کے ایگزیکٹو آرڈر پر دستخط کئے

امریکی صدر ڈونالڈ ٹرمپ نے جمعرات کو امریکہ،جاپان تجارتی معاہدے پر عمل درآمد کے ایک ایگزیکٹو آرڈر پر دستخط کئے ، وائٹ ہاؤس نے یہ اطلاع دی۔
ایگزیکٹو آرڈر میں کہا گیا کہ اس معاہدے کے تحت، امریکہ تقریباً تمام جاپانی درآمدات پر۱۵فیصد کی بنیادی شرح سے ٹیکس (ٹیرف) عائد کرے گا، جبکہ گاڑیوں اور گاڑیوں کے پرزے ، ہوابازی کی مصنوعات، عام ادویات، اور وہ قدرتی وسائل جو امریکہ میں قدرتی طور پر دستیاب یا پیدا نہیں ہوتے جیسے مخصوص شعبوں کے لیے علیحدہ علیحدہ طریقہ کار اپنایا جائے گا‘‘۔
ایگزیکٹو آرڈر میں مزید کہا گیا’’دوسری جانب، جاپان امریکی مینوفیکچرنگ، ہوابازی، زراعت، خوراک، توانائی، آٹوموبائل اور صنعتی مصنوعات کے شعبوں میں کام کرنے والے پروڈیوسرز کو اہم شعبوں میں بن تک رسائی کے لیے نمایاں مواقع فراہم کرے گا‘‘۔
ایگزیکٹو آرڈر کے مطابق، جاپان تیزی سے اس معاہدے پر عمل درآمد کی جانب گامزن ہے ، جس کے تحت وہ امریکی چاول کی خریداری میں۷۵فیصد اضافہ کرے گا اور ہر سال ۸؍ارب امریکی ڈالر مالیت کی امریکی زرعی مصنوعات خریدے گا۔
ایگزیکٹو آرڈر کے مطابق، جاپان اس بات پر بھی کام کر رہا ہے کہ امریکہ میں تیار کی گئی اور امریکی حفاظتی معیار کے مطابق تصدیق شدہ مسافر گاڑیوں کو جاپان میں بغیر کسی اضافی جانچ کے فروخت کی اجازت دی جائے ۔
ایگزیکٹو آرڈر میں دعوی کیا گیا ہے کہ جاپان نے امریکہ میں۵۵۰؍ارب ڈالر کی سرمایہ کاری کرنے پر اتفاق کیا ہے ۔
صدر ٹرمپ نے ۲۲جولائی کو امریکہ اور جاپان کے درمیان ایک فریم ورک معاہدے کا اعلان کیا تھا، جس کے بارے میں ان کا کہنا تھا کہ یہ باہمی مفادات اور قومی ترجیحات پر مبنی دو طرفہ تجارتی تعلقات کے ایک نئے دور کی بنیاد رکھتا ہے ۔