سی ایس کے انتظامیہ میں بڑی تبدیلی، سری نواسن اور روپا گروناتھ کی شمولیت متوقع

چنئی، 4 ستمبر (یو این آئی) سی ایس کے فرینچائز کے بورڈ آف ڈائریکٹرز میں ایک بڑی تبدیلی ہونے جا رہی ہے۔ این سری نواسن اور ان کی بیٹی روپا گروناتھ کو چنئی سپر کنگز کرکٹ لمیٹڈ (سی ایس کے سی ایل) کا ڈائرکٹر مقرر کیا جائے گا۔ یہ کمپنی آئی پی ایل میں سی ایس کے فرنچائز کی مالک ہے۔
سی ایس کے سی ایل کے بورڈ نے اس فیصلے کو منظوری دے دی ہے، لیکن اس فیصلے پر حتمی مہر 27 ستمبر کو ہونے والی سالانہ جنرل میٹنگ میں لگائی جائے گی۔ 80 سالہ سری نواسن گزشتہ کئی سالوں سے مؤثر طریقے سے ریٹائر ہیں اور عوام میں کم ہی نظر آتے ہیں۔ دوسری طرف روپا گروناتھ سارا کاروبار سنبھالتی ہیں۔ یہ پہلی بار ہے کہ انہیں سی ایس کے سی ایل کے بورڈ آف ڈائریکٹرز میں نامزد کیا گیا ہے۔ گروناتھ کل وقتی ڈائریکٹر ہوں گے۔ کاشی وشواناتھن کا نام بھی بورڈ میں منیجنگ ڈائریکٹر اور چیف ایگزیکٹو آفیسر کے طور پر شامل ہے۔
بی سی سی آئی کے سابق سکریٹری سنجے پٹیل، آر سری نواسن، راکیش سنگھ، پی ایل سبرامنیم، وی مانیکم اور ای جے شری بورڈ کے دیگر ڈائریکٹر ہیں۔
وشواناتھن نے کہا، ’یہ سی ایس کے کے لیے ایک بہت بڑا اعزاز ہے۔ وہ ہمارے لیے بہترین منتظم رہے ہیں اور مجھے بہت خوشی ہے کہ وہ سی ایس کے میں واپس آ گئے ہیں۔ وہ صرف مشیر کے کردار میں ہوں گے کیونکہ وہ زیادہ سفر نہیں کرتے، لیکن ہم ان کے ساتھ رابطے میں رہیں گے۔‘
واضح رہے کہ آئی پی ایل 2025 میں سی ایس کے کی کارکردگی بہت خراب رہی۔ وہ پہلی بار پوائنٹس ٹیبل میں سب سے نیچے رہی۔ ان کی ٹیم 14 میں سے صرف چار میچ جیت سکی۔ سیزن کے آغاز میں ٹیم کی قیادت رتوراج گائیکواڑ کر رہے تھے، لیکن وہ پانچ میچوں کے بعد زخمی ہو گئے اور پھر ایم ایس دھونی نے کپتانی سنبھالی۔