کانگریس کی ”محبت کی دکان” دراصل فراڈ اور دھوکے کا بازار ہے : بی جے پی

نئی دہلی، 03 ستمبر (یو این آئی) بھارتیہ جنتا پارٹی (بی جے پی) نے بدھ کے روز کانگریس لیڈر پون کھیڑا پر دو ووٹر کارڈ رکھنے کا الزام لگانے کے بعد اب اُن کی اہلیہ پر بھی دو ووٹر کارڈ رکھنے کا الزام عائد کیا ہے ۔
بی جے پی کی ترجمان شاذیہ علمی نے کہا کہ کانگریس پارٹی، جو خود کو ‘‘محبت کی دکان’’ کہتی ہے ، درحقیقت دھوکے اور فریب کا بازار ہے ۔ انہوں نے الزام لگایا کہ بہار میں کانگریس کی ‘‘ووٹرادھیکار یاترا’’ صرف عوام کو گمراہ کرنے کے لیے کی گئی تھی۔
بی جے پی ترجمان نے کہا کہ کانگریس لیڈر پون کھیڑا کے پاس دو ای پی آئی سی (ووٹر کارڈ) ملنے کے بعد ان کی اہلیہ، جو 2023 میں تلنگانہ کی 60 خَیرات آباد اسمبلی سیٹ سے امیدوار تھیں، ان کے نام پر بھی دو ووٹر کارڈ ملے ہیں۔ ان کا کہنا تھا کہ نیلیما کھیڑا کے پاس نئی دہلی کا ایک اور ووٹر کارڈ بھی ہے ۔
بی جے پی کی ترجمان نے مطالبہ کیا کہ الیکشن کمیشن اس معاملے کی اعلیٰ سطحی جانچ کرے اور قصورواروں کے خلاف مناسب کارروائی کی جائے ۔