سنسنی خیز مقابلے میں سری لنکا نے زمبابوے کو سات رنز سے شکست دی

ہرارے، 30اگست (یواین آئی) پتھم نسانکا (76)، جنیت لیاناگے (ناٹ آؤٹ 70) اور کامینڈو مینڈس (57) کی نصف سنچری اننگز کے بعد دلشان مدوشانکا (چار وکٹیں) کی شاندار گیند بازی کی بدولت سری لنکا نے جمعہ کو پہلے ایک روزہ میچ میں زمبابوے کو سات رنز سے ہرا دیا۔ اس کے ساتھ ہی سری لنکا نے دو میچوں کی سیریز میں 0-1 سے برتری حاصل کر لی۔ دلشان مدوشانکا کو ان کی شاندار کارکردگی کے لیے ’پلیئر آف دی میچ‘ سے نوازا گیا۔
299 رنز کے ہدف کے تعاقب میں اتری زمبابوے کی شروعات انتہائی خراب رہی اور اس نے صفر پر اپنی دو وکٹیں گنوا دیں۔ برائن بینٹ اور برینڈن ٹیلر کو اسیتا فرنینڈو نے بغیر کھاتہ کھولے ہی پویلین واپس بھیج دیا۔ اس مشکل وقت میں بین کرن اور کپتان شان ولیمز نے تیسرے وکٹ کے لیے 118 رنز کی شراکت داری کر کے زمبابوے کی میچ جیتنے کی امیدوں کو زندہ رکھا۔ 23ویں اوور میں کامینڈو مینڈس نے شان ولیمز کو آؤٹ کر کے زمبابوے کو تیسرا جھٹکا دیا۔ شان ولیمز نے 54 گیندوں پر سات چوکوں اور دو چھکوں کی مدد سے 57 رنز بنائے۔ اس کے بعد بیٹنگ کے لیے آنے والے سکندر رضا نے اننگز کو سنبھالنے کی کوشش کی۔ 26ویں اوور میں اسیتا فرنینڈو نے بین کرن کو اپنا شکار بنا کر ایک بار پھر زمبابوے کو مشکل میں ڈال دیا۔ بین کرن نے 90 گیندوں پر آٹھ چوکوں کی مدد سے 70 رنز بنائے۔ ویسلی مادھیویرے آٹھ رنز بنا کر آؤٹ ہوئے۔ ٹونی منیونگا نے سکندر رضا کے ساتھ مل کر ٹیم کو جیت کے قریب پہنچایا تھا۔ اس موقع پر میچ کے آخری اوور میں، جب زمبابوے کو جیت کے لیے 10 رنز درکار تھے، مدوشانکا نے لگاتار تین وکٹیں لے کر میچ سری لنکا کی جھولی میں ڈال دیا۔ انہوں نے پہلی گیند پر سکندر رضا کو بولڈ کیا۔ سکندر رضا نے 87 گیندوں پر آٹھ چوکوں کی مدد سے 92 رنز کی اننگز کھیلی۔ اگلی گیند پر بریڈ ایونز (صفر) اور تیسری گیند پر رچرڈ اینگراوا (صفر) کو آؤٹ کر کے پویلین واپس بھیج دیا۔ زمبابوے کی ٹیم مقررہ 50 اوورز میں آٹھ وکٹوں پر 291 رنز ہی بنا سکی اور میچ سات رنز سے ہار گئی۔ ٹونی منیونگا 43 رنز بنا کر ناٹ آؤٹ رہے۔
سری لنکا کی جانب سے دلشان مدوشانکا نے چار وکٹیں حاصل کیں۔ اسیتا فرنینڈو نے تین وکٹیں لیں۔ کامینڈو مینڈس نے ایک بلے باز کو آؤٹ کیا۔