وزیر اعظم مودی کے دورہ چین سے دوطرفہ تعلقات کو دوبارہ پٹری پر لانے کی امید

نئی دہلی، 28 اکتوبر (یو این آئی) وزیر اعظم نریندر مودی، جو سات سال سے زائد عرصے کے بعد چین کا دورہ کر رہے ہیں، گزشتہ ایک سال میں دوسری بار صدر شی جن پنگ سے ملاقات کریں گے اور دونوں ممالک کو امید ہے کہ وہ پانچ سال قبل وادی گلوان میں اپنے فوجیوں کے درمیان پرتشدد تصادم سے پیدا ہونے والی تلخی کو دور کرنے اور تجارت سمیت تمام شعبوں میں دو طرفہ تعلقات کو دوبارہ پٹری پر لانے کی طرف آگے بڑھیں گے جاپان کے دو روزہ دورے کے بعد مودی 31 اگست کو براہ راست چین جائیں گے جہاں وہ یکم ستمبر کو تیانجن میں شنگھائی تعاون تنظیم (ایس سی او) کے سربراہان مملکت کے سربراہی اجلاس میں شرکت کریں گے۔ مسٹر مودی چوٹی کانفرنس کے دوران چینی صدر سے بھی ملاقات کریں گے۔ ان کی روسی صدر ولادیمیر پوتن سمیت کئی عالمی رہنماؤں سے دو طرفہ ملاقاتوں کا بھی امکان ہے۔
وزیر اعظم کا دورہ چین اور صدر شی جن پنگ کے ساتھ ان کی بات چیت کو امریکہ کی طرف سے ہندوستان سمیت مختلف ممالک پر عائد بھاری درآمداتی محصولات کی وجہ سے دنیا بھر میں تجارتی محاذ پر ہنگامہ آرائی کے درمیان انتہائی اہم سمجھا جارہا ہے۔ مسٹر مودی اور مسٹر جن پنگ کے درمیان بات چیت سے سرحد پر امن اور ہم آہنگی کو برقرار رکھنے کے لیے اہم زیر التوا مسائل کو حل کرنے میں پیش رفت کی بھی امید ہے۔
دونوں ممالک کے درمیان باہمی شراکت داری کو وقتاً فوقتاً نامساعد حالات کی وجہ سے چیلنجز کا سامنا کرنا پڑا ہے اور مسلسل بدلتے ہوئے جغرافیائی سیاسی اور سماجی حالات میں دونوں کو ایک بار پھر گلوان واقعہ کے پانچ سال بعد اسی نقطہ سے آگے بڑھنے کا چیلنج درپیش ہے۔
1950 میں شروع ہونے والے دونوں ممالک کے تعلقات کو 1962 کے سرحدی تنازع کے بعد پہلی بار چیلنجوں کا سامنا کرنا پڑا۔ اس کے بعد تعلقات مختلف اتار چڑھاؤ سے گزرے اور مودی حکومت کے اقتدار میں آنے کے بعد ووہان اور چنئی میں مودی اور شی جن پنگ کے درمیان غیر رسمی سربراہی ملاقاتوں کی مدد سے دوبارہ پٹری پر آگئے۔ ایک غیر متوقع پیش رفت میں، اپریل-مئی 2020 میں گلوان میں پرتشدد فوجی جھڑپ نے ایک بار پھر دونوں ممالک کے تعلقات کو شدید دھچکا پہنچایا۔ گزشتہ سال روس کے شہر کازان میں برکس سربراہی اجلاس کے دوران وزیر اعظم مودی اور صدر شی جن پنگ کے درمیان ملاقات کے بعد سے مرحلہ وار طریقے سے تعلقات کو بہتر بنانے کی کوششیں کی گئی ہیں۔ وزیر خارجہ ایس جے شنکر کے حالیہ دورہ چین اور اس ماہ ہندوستان میں ڈاکٹر جے شنکر کے ساتھ چینی وزیر خارجہ وانگ یی کی دو طرفہ بات چیت اور قومی سلامتی کے مشیر اجیت ڈووال کے ساتھ خصوصی نمائندہ سطح کی 24ویں دور کی ملاقات میں دونوں ممالک کے تعلقات کو دوبارہ پٹری پر لانے کی سمت میں کئی اہم فیصلے لیے گئے۔ مسٹر وانگ نے وزیر اعظم نریندر مودی سے بھی ملاقات کی۔
ان ملاقاتوں کے بعد چین نے ہندوستان کو کھادوں، نایاب زمینی معدنیات اور ٹنل بورنگ مشینوں کی برآمد پر پابندی ہٹانے پر رضامندی ظاہر کی ہے۔ اس کے علاوہ سرحد سے متعلق زیر التوا مسائل کو حل کرنے کے لیے انتظامات اور خصوصی میکانزم بنانے کے لیے ایک معاہدہ طے پایا ہے۔
اس سال کیلاش مانسروور یاترا کے دوبارہ شروع ہونے کے ساتھ ہی دونوں ممالک نے اپنے شہریوں کو ویزا جاری کرنے کے عمل کو دوبارہ شروع کرنے پر بھی اتفاق کیا ہے۔ اس کے علاوہ ہندوستان اور چین کے درمیان براہ راست پروازوں کے لیے بات چیت جاری ہے۔