ادھو ٹھاکرے اہل خانہ کے ساتھ راج ٹھاکرے کی رہائش پر گنپتی پوجا میں شریک

ممبئی ، 27 اگست (یو این آئی) شیوسینا (یو بی ٹی) کے صدر ادھو ٹھاکرے بدھ کے روز اپنے اہل خانہ کے ہمراہ مہاراشٹر نو نرمان سینا کے صدر راج ٹھاکرے کی دادر میں واقع رہائش گاہ پر پہنچے اور وہاں گنپتی پوجا میں شامل ہوئے ۔ اس موقع پر ادھو ٹھاکرے کے ساتھ ان کی اہلیہ رشمی ٹھاکرے ، بیٹے آدتیہ اور تیجس ٹھاکرے بھی موجود تھے ۔ بعد ازاں دونوں خاندانوں نے مل کر دوپہر کا کھانا تناول کیا۔
دادر میں راج ٹھاکرے کی رہائش گاہ ‘‘شیو تیرتھ’’ پر گنپتی کی مورتی بدھ کے روز نصب کی گئی تھی۔ اسی موقع پر راج ٹھاکرے نے ادھو ٹھاکرے کو مدعو کیا، جس کے بعد وہ اپنے اہل خانہ کے ساتھ وہاں پہنچے ۔ ادھو ٹھاکرے تقریباً ڈیڑھ گھنٹے تک راج ٹھاکرے کے گھر پر موجود رہے ۔ ملاقات کے دوران دونوں خاندانوں کے درمیان مختلف امور پر تبادلۂ خیال ہوا۔
ریاستی نائب وزیر اعلیٰ دیویندر فڑنویس نے اس ملاقات پر ردعمل ظاہر کرتے ہوئے کہا کہ گنپتی بپّا کے آشیرواد سے دونوں بھائی ایک ساتھ آئے ہیں اور وہ چاہتے ہیں کہ یہ بھائی چارہ برقرار رہے ۔ سینئر وزیر چھگن بھجبل نے بھی اسے مہاراشٹر کے لیے نیک شگون قرار دیا اور کہا کہ بھگوان گنیش نے دونوں بھائیوں کو قریب کیا ہے ۔ تاہم بی جے پی کے رہنما اور ادھو کے مخالف نارائن رانے نے کہا کہ بھائیوں کے اتحاد کے لیے کسی خاص وقت کی ضرورت نہیں، مگر اس کا ریاست کی سیاست پر کوئی اثر مرتب نہیں ہوگا۔
یہ بات قابل ذکر ہے کہ شیوسینا چھوڑنے کے تقریباً بیس سال بعد ادھو اور راج ٹھاکرے کے درمیان دوبارہ قربت دیکھی جا رہی ہے ۔ پچھلے دو ماہ میں یہ دونوں رہنماؤں کی تیسری ملاقات تھی۔ مراٹھی زبان کے مسئلہ پر بھی دونوں کے درمیان تلخی میں کمی آئی ہے ۔ اب سب کی نگاہیں اس بات پر ہیں کہ آنے والے بلدیاتی انتخابات میں ٹھاکرے برادران کا سیاسی مستقبل کس انداز میں سامنے آتا ہے ۔