صدرجمہوریہ نے ڈورنڈ کپ جیتنے پر نارتھ ایسٹ یونائیٹڈ ایف سی کو مبارکباد دی

نئی دہلی، 27 اگست (یواین آئی) راشٹرپتی بھون میں آج منعقدہ ایک خصوصی تقریب میں صدر جمہوریہ محترمہ دروپدی مرمو نے نارتھ ایسٹ یونائیٹڈ فٹبال کلب (این ای یو ایف سی) کو انڈین آئل ڈورانڈ کپ 2025 کا تاریخی خطاب جیتنے پر اعزاز سے نوازا۔
صدرجمہوریہ نے فاتح ٹیم کو "پریزیڈنٹس کپ” پیش کیا ـ جو چیمپئن کو دی جانے والی تین باوقار ٹرافیوں میں سے ایک ہے۔ یہ لمحہ کلب، اس کے حامیوں اور پورے فٹبال کمیونٹی کے لیے باعث فخر ہے۔
1956 میں ہندوستان کے پہلے صدر جمہوریہ ڈاکٹر راجندر پرساد کی جانب سے قائم کردہ "پریزیڈنٹس کپ” ہمیشہ سے اعلیٰ معیار اور اعزاز کی علامت رہا ہے، جو اس ٹورنامنٹ کو ملک کی شاندار وراثت سے جوڑتا ہے۔ یہ تقریب نہ صرف این ای یو ایف سی کی کامیابی کا جشن تھی بلکہ ہندوستانی مسلح افواج کی اس تاریخی وراثت کو بھی اجاگر کرتی ہے، جنہوں نے فٹبال کو فروغ دیا اور قومی یکجہتی کو مستحکم کیا۔
صدرجمہوریہ نے یہ ٹرافی جان ابراہم (مالک، این ای یو ایف سی)، ریڈیم تلاِنگ (کپتان، این ای یو ایف سی) اور مندار وِجے کمار تامھانے (سی ای او، این ای یو ایف سی) کو سونپی۔ اس موقع پر ڈورنڈ فٹبال ٹورنامنٹ سوسائٹی اور ڈورنڈ کپ آرگنائزنگ کمیٹی کے معزز اراکین بھی موجود تھے۔
کلب کی جانب سے بات کرتے ہوئے جان ابراہم نے صدر جمہوریہ کے اس اعزاز پر شکریہ ادا کیا اور ہندوستانی مسلح افواج کی تعریف کی جنہوں نے ڈورنڈ کپ کی شاندار وراثت کو محفوظ رکھنے میں اہم کردار ادا کیا ہے۔ انہوں نے خصوصی طور پر ایسٹرن کمانڈ کی ستائش کی، جنہوں نے اس ٹورنامنٹ کو نئی بلندیوں تک پہنچایا اور مشرقی و شمال مشرقی ہندوستان میں فٹبال کے کھلاڑیوں کی صلاحیت کو نکھارنے کے لیے مسلسل کوششیں کیں، جس سے ہندوستانی فٹبال کی مجموعی ترقی میں اہم تعاون ملا۔