گجرات میں ’کھیلوں کا قومی دن‘ منایا جائے گا

گاندھی نگر، 27 اگست (یواین آئی) گجرات میں 29 سے 31 اگست تک کھیلوں کا قومی دن منایا جائے گا۔
سرکاری ذرائع نے بدھ کے روز بتایا کہ ہندوستان کے کھیلوں کے عظیم کھلاڑی میجر دھیان چند کی ہندوستانی کھیل کود کے شعبے میں دی گئی خدمات کے احترام میں ہر سال 29 اگست کو پورے ہندوستان میں ’کھیلوں کا قومی دن‘ (نیشنل اسپورٹس ڈے) منایا جاتا ہے۔ اس سال کھیلوں کا قومی دن 2025 کے موقع پر وزیر اعظم نریندر مودی کی قیادت میں مرکزی حکومت نے 29 سے 31 اگست تک تین روزہ کھیلوں کے قومی کی تقاریب کا اعلان کیا ہے۔
’ایک گھنٹہ کھیل کے میدان میں‘ اور ’ہر گلی، میدان، کھیلے سارا ہندوستان‘ جیسے نعروں کے ساتھ اس سال پورا ملک کھیل، جوش و خروش اور اتحاد کا یہ تین روزہ قومی جشن منائے گا اور میجر دھیان چند کو خراجِ عقیدت پیش کرے گا۔ اسی تناظر میں وزیر اعلیٰ بھوپندر پٹیل کی قیادت میں گجرات میں بھی 29 سے 31 اگست تک تین دن کے لیے کھیل کا قومی دن منایا جائے گا۔
ہر سال کھیلوں کے قومی دن کے موقع پر بہترین کھلاڑیوں کو قومی کھیل ایوارڈ دیے جاتے ہیں، جو پورے ملک میں کھیلوں کے میدان میں بہترین کارکردگی اور کامیابیوں کا اعتراف ہوتے ہیں۔ سال 2019 میں وزیر اعظم مودی کے جرات مندانہ اور جامع وژن کے ساتھ فٹ انڈیا موومنٹ لانچ کی گئی تھی، جس کا مقصد ملک میں فٹنس اور کھیلوں کی مضبوط ثقافت کو فروغ دینا، کھیل کے ذریعے پورے ہندوستان کو جوڑنا اور سب کے لیے فٹنس کو فروغ دینا ہے۔
گجرات میں کھیلوں کے قومی دن 2025 کے تین روزہ جشن کے لیے تمام اضلاع میں تقریبات کا انعقاد کیا جائے گا۔ اس کے لیے کلکٹر آفس، کمشنر آفس اور ڈائریکٹر جنرل آف پولیس آفس کے ذریعے تمام اضلاع کو متحرک کیا جائے گا۔ ہر ضلع میں کھیلوں کا کم از کم ایک بڑا پروگرام اور تحصیل سطح پر دیگر پروگرام منعقد کیے جائیں گے۔ اس کے لیے ضلع وار نوڈل افسران (ڈی ایس ڈی او اور ڈی ایس او) کی تقرری کی جائے گی۔ اس کے علاوہ تمام اضلاع میں وی آئی پی اور کھیلوں کی دنیا کی شخصیات کو تقریب میں مدعو کیا جائے گا۔