کاشی رودراکش نے گورکھپور لائینز کو 50 رنز سے شکست دی

لکھنؤ، 19 اگست (یو این آئی) شِوَم ماوی (54 رنز، تین وکٹ) اور شِیوَا سنگھ (ناٹ آوٹ 34) کے درمیان 87 رنز کی طوفانی شراکت کی بدولت کاشی رودراکش نے پیر کے روزیو پی ٹی-20 لیگ کے دوسرے مقابلے میں گورکھپور لائینز کے خلاف 50 رنز سے آسان فتح حاصل کی۔
اکانا اسٹیڈیم میں پہلے بلے بازی کرتے ہوئے کاشی رودراکش نے 89 رنز پر سات وکٹیں گنوا کر ایک وقت بحران کا سامنا کیا، لیکن شِوَم ماوی اور شِیوَا سنگھ نے بے خوف بلے بازی کا مظاہرہ کرتے ہوئے نہ صرف ٹیم کو مشکلات سے نکالا بلکہ 176 رنز کا ایک چیلنجنگ اسکور کھڑا کرنے میں اہم کردار ادا کیا۔ ماوی اننگز کی آخری گیند پر آؤٹ ہوئے، اس سے پہلے وہ صرف 21 گیندوں پر چھ شاندار چھکے لگا چکے تھے۔ انہوں نے گیند بازی میں بھی اپنی ٹیم کی جیت میں کلیدی کردار ادا کیا اور 24 رنز دے کر تین اہم وکٹیں حاصل کیں۔
ہدف کے تعاقب میں گورکھپور لائینز کے بلے باز جدوجہد کرتے نظر آئے۔ کپتان آکاشدیپ ناتھ (34) اور پرنس یادو (49) کے علاوہ دیگر کھلاڑی وکٹ پر زیادہ دیر تک رکنے میں ناکام رہے۔ چھ بلے باز تو اپنے انفرادی اسکور کو دوہرے ہندسے تک بھی نہ پہنچا سکے اور پوری ٹیم 19.1 اوور میں 126 رنز بنا کر پویلین لوٹ گئی۔