افسران کومصنوعی ذہانت اور بلاک چین جیسی جدید ترین ٹیکنالوجی کا استعمال کرنا چاہیے :صدر جمہوریہ

نئی دہلی//صدر جمہوریہ دروپدی مرمو نے ڈیفنس اسٹیٹ سروس کے افسران سے کہا ہے کہ وہ اپنے کام میں املاک کے ریکارڈ کو محفوظ رکھنے کے لیے مصنوعی ذہانت، ڈرون پر مبنی زمینی سروے ، سیٹلائٹ امیجز اور بلاک چین جیسی جدید ترین ٹیکنالوجی کا استعمال کریں۔
محترمہ مرمو نے بدھ کو یہاں راشٹرپتی بھون میں انڈین ڈیفنس اسٹیٹس سروس، ملٹری انجینئر سروس اور سینٹرل واٹر انجینئرنگ سروس کے زیر تربیت افسران کے ساتھ میٹنگ کے دوران یہ بات کہی۔
ڈیفنس اسٹیٹس سروس کے افسران سے خطاب کرتے ہوئے صدر جمہوریہ نے کہا کہ تیزی سے بدلتی ہوئی ٹیکنالوجی کے اس دور میں ڈیجیٹل طریقوں کا انضمام انتہائی ضروری ہے ۔ ‘‘یہ ان کا فرض ہے کہ وہ ٹیکنالوجی میں ہونے والی پیشرفت سے باخبر رہیں اور انہیں بروئے کار لائیں۔’’
انہوں نے افسران کو مشورہ دیا کہ وہ بنیادی ڈھانچے کی ترقی میں ماحول دوست طریقے اپنائیں، قابل تجدید توانائی کے حل اپنائیں، کچرے کو کم کریں اور چھاؤنیوں میں پانی کے تحفظ کو یقینی بنائیں۔
سنٹرل واٹر انجینئرنگ سروس کے افسران سے خطاب کرتے ہوئے صدر نے کہا کہ پائیدار ترقی اور آبی وسائل کا موثر بندوبست پانی کی حفاظت اور ترقی کی کلید ہے ۔ انہوں نے کہا کہ صاف پانی اور پانی کے تحفظ کو فروغ دے کر صحت عامہ کو بہتر بنایا جا سکتا ہے ، زرعی پیداوار کو بڑھایا جا سکتا ہے اور قدرتی وسائل کے پائیدار استعمال کو یقینی بنایا جا سکتا ہے ۔
یو این آئی- م ک