پہلگام//
لیفٹیننٹ گورنر‘ منوج سِنہانے آج ننون اور چندن واڑی بیس کیمپوں کا دورہ کیا اور شری امرناتھ جی یاترا کیلئے یاتریوں کو فراہم کی جانے والی سہولیات اور خدمات کا جائزہ لیا۔
سنہا نے یاتریوں، خدمت فراہم کرنے والوں، لنگر سیواداروں، صفائی کارکنوں، طبی عملے اور یاترا کیلئے تعینات اِنتظامی، پولیس اور سیکورٹی اہلکاروں سے بات چیت کی۔ اُنہوں نے مختلف محکموں کے اِنتظامات، لاجسٹکس، قیام و طعام، ڈیزاسٹرمینجمنٹ، صحت سہولیات اور پہلگام محور پر یاترا کے بیس کیمپوں میں دستیاب دیگر سہولیات کا جائزہ لیا۔
ایل جی نے کیمپ ڈائریکٹروں، شرائین بورڈ، سول و پولیس اِنتظامیہ، سیکورٹی فورسز، خدمت فراہم کرنے والوں، رضاکاروں اور شری بابا برفانی کے عقیدت مندوں کے لئے یاترا کو خوشگوار اور یادگار بنانے میں شامل تمام افراد کے جذبے، لگن اور محنت کو سراہا۔
لیفٹیننٹ گورنر نے کہا’’شری امرناتھ جی یاترا۳۵ء۳لاکھ یاتریوں کا ہندسہ عبور کر چکی ہے۔ یاترا کی کامیابی یونین ٹیریٹری میں سیاحتی شعبے کو نمایاں فروغ دے گی۔ یاتریوں کی طرف سے ۹۷ فیصد مثبت تاثرات موصول ہوئے ہیں۔ یاترا خوش اسلوبی سے جاری ہے اور تمام توقعات پر پوری اُتر رہی ہے۔ ہم بیس کیمپوں میں ایک زبردست اور بے مثال روحانیت کے ماحول کا مشاہدہ کر رہے ہیں۔‘‘
ایل جی نے طبی حکام کو ہدایت دی کہ یاتریوں میں صحت سے متعلق پیش آنے والے واقعات کا گہرائی سے تجزیہ کیا جائے اور عقیدت مندوں کے لئے صحت کے مجموعی نتائج کو بہتر بنانے کے لئے احتیاطی تدابیر اِختیار کریں۔لیفٹیننٹ گورنر نے یاترا فیڈبیک سسٹم کا بھی جائزہ لیا اور ٹریفک سے متعلق فیڈبیک شامل کرنے کی ہدایت دی تاکہ بہتر ٹریفک مینجمنٹ کو یقینی بنایا جا سکے اور یاتریوں کی روانی میں سہولیت فراہم کی جا سکے۔
لیفٹیننٹ گورنر کے ہمراہ اُن کے پرنسپل سیکرٹری اور سی اِی او شری اَمرناتھ جی شرائین بورڈ ڈاکٹر مندیپ کے بھنڈاری، صوبائی کمشنر کشمیر وِجے کمار بدوری ، آئی جی پی کشمیر وی کے بردی ، ایم ڈِی جے کے پی ڈ،ی سی ایل و نوڈل آفیسر یاترا بئے پہلگام محوم راہل یادو ،ضلع ترقیاتی کمشنر اننت ناگ سیّد فکر الدین حامد اور دیگر سینئر افسران بھی تھے۔
