وزیر اعظم مودی جمعہ کے روز بہار، مغربی بنگال کا دورہ کریں گے

نئی دہلی//وزیر اعظم نریندر مودی جمعہ کے روز بہار اور مغربی بنگال کے دورے پر رہیں گے ۔اس دوران وزیر اعظم 12,000 کروڑ روپے سے زیادہ کے ترقیاتی منصوبوں کا سنگ بنیاد اور افتتاح کریں گے ۔ ان میں ریلوے ، سڑک، گیس، توانائی، ماہی پروری، آئی ٹی اور دیہی ترقی جیسے کئی شعبوں کی اسکیمیں شامل ہیں۔
مسٹر مودی کل سب سے پہلے بہار پہنچیں گے اور صبح 11.30 بجے موتیہاری میں ریل، سڑک، دیہی ترقی، ماہی پروری، الیکٹرانکس اور انفارمیشن ٹیکنالوجی کے شعبوں سے متعلق 7200 کروڑ روپے سے زیادہ کے ترقیاتی منصوبوں کا سنگ بنیاد رکھیں گے اور افتتاح کریں گے اورعوامی جلسے سے خطاب کریں گے ۔
وزیر اعظم کئی ریل پروجیکٹوں کو قوم کے نام وقف کرنے والے ہیں۔ اس میں سمستی پور-بچھواڑا ریل لائن کے درمیان خودکار سگنلنگ بھی شامل ہے ، جو اس سیکشن پر موثر ریل آپریشن کو ممکن بنائے گا۔ دربھنگہ-تھلوارہ اور سمستی پور-رام بھدر پور ریل لائنوں کو ڈبل کرنا، دربھنگہ-سمستی پور لائن ڈبل کرنے کے پروجیکٹ کا حصہ ہے ، جس کا تخمینہ 580 کروڑ روپے سے زیادہ ہے ، جس سے ریل آمد ورفت میں بہتر ی آئے گی ۔
وزیر اعظم سڑک کے بنیادی ڈھانچے کو فروغ دینے کے لیے قومی شاہراہ 319 کے آرا بائی پاس کو 4 لین کرنے کے لیے سنگ بنیاد رکھیں گے ۔ یہ آرا-موہنیا قومی شاہراہ 319 اور پٹنہ-بکسر قومی شاہراہ 922 کو جوڑے گا، بغیر کسی رکاوٹ کے رابطے کو یقینی بنائے گا اور سفر کے وقت کو کم کرے گا۔ مسٹر مودی قومی شاہراہ 319 کے پریا سے موہنیا تک 4 لین والے حصے کا بھی افتتاح کریں گے ، جس کا تخمینہ 820 کروڑ روپے سے زیادہ ہے ۔ یہ قومی شاہراہ 319 کا ایک حصہ ہے ،جو آرا شہر کو نیشنل ہائی وے 2 سے جوڑتا ہے ۔ اس سے سامان اور مسافروں کی نقل و حرکت میں بہتری آئے گی۔ اس کے علاوہ، قومی شاہراہ 333سی پر سرون سے چکائی تک 2 لین والی پکی سڑک کا بھی افتتاح کیا جائے گا، جو سامان اور لوگوں کی نقل و حرکت کو آسان بنائے گا اور بہار اور جھارکھنڈ کے درمیان ایک اہم رابطے کا کام کرے گا۔
اس کے علاوہ بھی وزیر اعظم مودی متعدد ترقیاتی کاموں کا سنگ بنیاد رکھیں گے اور افتتاح کریں گے ۔
وزیر اعظم مودی بہار کے بعد مغربی بنگال کا دورہ کریں گے اور دوپہر 3:00 بجے درگاپور میں 5000 کروڑ روپے سے زیادہ مالیت کے کئی ترقیاتی پروجیکٹوں کا افتتاح اور سنگ بنیاد رکھیں گے اورعوامی اجلاس سے خطاب بھی کریں گے ۔