سرینگر//
جموں کشمیر کی وزیر تعلیم سکینہ ایتو نے ہفتہ کے روز کہا ہے کہ وادی میں اسکولوں کے اوقات کار میں تبدیلی کا فیصلہ تمام متعلقہ فریقین سے مشاورت کے بعد کیا گیا ہے ۔
اوقات کار میں تبدیلی ‘ جس کا اطلاق پیر ۱۴جولائی سے ہو گا ‘ کے بعد سرینگر میونسپل حدود میں آنے والے اسکول صبح ساڈھے ۸ سے اڈھائی بجے اور ان حدود سے باہر اسکول صبح ۹ بجے سے ۳ بجے تک کھلے رہیں گے ۔
ہفتہ کو سرینگر میں نامہ نگاروں سے بات چیت کے دوران ایتو نے کہا کہ حکومت نے اسکول ٹائمنگ میں تبدیلی سے متعلق محکمہ تعلیم کے دونوں خطوں کے ڈائریکٹرز اور سکریٹری سے تجاویز اور آراء طلب کی تھیں۔
ایتو نے کہا کہ موسمی حالات میں تبدیلی اور متعلقہ اسٹیک ہولڈرز کی سفارشات کو مدِنظر رکھتے ہوئے اسکول کے نئے اوقات مقرر کیے گئے ہیں۔
وزیر تعلیم نے ان قیاس آرائیوں کو بھی مسترد کر دیا جن میں کہا جا رہا تھا کہ گرمائی تعطیلات میں توسیع کی جائے گی۔
ان کاکہنا تھا ’’حال ہی میں کئی دنوں تک اسکول بند رہے تھے ، اگر گرمیوں کی چھٹیوں میں مزید توسیع کی جاتی تو نصاب مکمل کرنا مشکل ہو جاتا۔ اس لیے تعطیلات میں اضافہ ممکن نہیں تھا‘‘۔
وزیر تعلیم نے کہا’’اگر ہم نے موسم گرما کی تعطیلات میں توسیع کر دی ہوتی تو نصاب وقت پر مکمل نہیں ہوتا۔ بچے اور والدین ہمیں فون کر رہے تھے ، چھٹیوں میں توسیع کے بجائے اسکول کے اوقات میں تبدیلی کے لیے زور دے رہے تھے۔ محکمہ نے ان کی رائے کو سنجیدگی سے لیا‘‘۔
ایتو نے وضاحت کی کہ محکمہ تعلیم نے اس سے قبل کسی بھی حتمی فیصلے کو نافذ کرنے سے پہلے عوامی رائے شروع کرنے کے لیے ایک سرکلر جاری کیا تھا۔ ان کاکہنا تھا ’’میں نے متعلقہ حکام کو ہدایت کی تھی کہ وہ اس مسئلے کو عوامی دائرے میں لائیں تاکہ ہم لوگوں کے مزاج اور خدشات کا اندازہ لگا سکیں۔ ان کے ردعمل کی بنیاد پر ، ہم نے اسکول کے ٹائم شیڈول میں تبدیلی کی ہے‘‘۔
وزیر تعلیم نے زور دے کر کہا کہ حکومت کا بنیادی مقصد اس بات کو یقینی بنانا ہے کہ طلباء تعلیمی طور پر مسابقتی ہوں اور تدریسی اوقات سے محروم ہونے کی وجہ سے پیچھے نہ رہیں۔ ان کاکہنا تھا’’ہم اپنے بچوں کو قومی سطح پر مسابقتی بنانے پر توجہ مرکوز کر رہے ہیں۔ اس کیلئے مناسب تدریسی وقت اور نصاب کی بروقت تکمیل کی ضرورت ہے‘‘۔
وزیر تعلیم نے یہ بھی یقین دلایا کہ محکمہ تعلیمی ترجیحات کو برقرار رکھتے ہوئے عوامی خدشات کے تئیں حساس رہے گا۔
واضح رہے کہ محکمہ تعلیم نے موسم میں بہتری کے پیش نظر اسکولوں کے اوقات کار میں تبدیلی لائی ہے ۔
حکم نامے کے مطابق، یہ ترمیم شدہ اوقات تمام سرکاری اور منظور شدہ نجی اسکولوں پر یکساں طور پر لاگو ہوں گے ۔
ناظم تعلیم کے مطابق شہری و میونسپل حدود میں واقع اسکولوں کیلئے اسکولوں کے اوقات کار صبح۳۰:۸بجے سے دوپہر ۳۰:۲بجے تک مقرر کئے گئے ہیں جبکہ دیہی اور میونسپل حدود سے باہر واقع اسکولوں میں تدریسی اوقات صبح۰:۹بجے سے شام ۰:۳بجے تک ہوں گے ۔
