وکرم مسری نے امارات میں دفاعی امور کی کمیٹی کے چیئرمین علی النعیمی سے ملاقات کی

نئی دہلی//ہندوستان اور متحدہ عرب امارات نے ہر قسم کی دہشت گردی سے نمٹنے کے لیے تعاون کے عزم کا اعادہ کیا ہے ۔
متحدہ عرب امارات کے دورے پر گئے ہندوستانی سکریٹری خارجہ وکرم مسری نے منگل کے روزابوظہبی میں فیڈرل نیشنل کونسل کے دفاعی امور، داخلی و خارجی امور کی کمیٹی کے چیئرمین علی النعیمی سے ملاقات کی اور دہشت گردی سے لے کر پارلیمانی تعاون تک کے موضوعات پر تبادلہ خیال کیا۔
مسٹرعلی النعیمی کو دہشت گردی کے خلاف اور عالمی امن کے حامی کے طور پر جانا جاتا ہے ۔
سیکریٹری خارجہ وکرم مسری نے امارات کے ایک دیگروزیر شیخ نہیان بن مبارک النہیان سے بھی ملاقات کی۔
ابوظہبی میں ہندوستانی سفارتخانے نے سوشل میڈیا پلیٹ فارم ایکس پر پوسٹ میں اس میٹنگ کے بارے میں بتایا۔ پوسٹ میں لکھا گیا، "”وزارتِ خارجہ کے سکریٹری وکرم مِسرِی نے فیڈرل نیشنل کونسل کے دفاعی امور، داخلی اور خارجی امور کی کمیٹی کے چیئرمین علی النعیمی سے ملاقات کی اور دہشت گردی کی تمام اقسام اور صورتوں سے نمٹنے کے لیے پختہ عزم کا اعادہ کیا۔ ہندوستان-یو اے ای پارلیمانی تعاون پر بھی گفتگو ہوئی۔”
شیخ النہیان کے ساتھ ملاقات کے بارے میں سفارتخانے نے پوسٹ کیا:
"وزارتِ خارجہ کے سکریٹری وکرم مِسرِی نے آج ابو ظہبی میں شیخ نہیان بن مبارک النہیان سے ملاقات کی۔”
انہوں نے ہندوستان اور امارات کے درمیان ہم آہنگی اور رواداری کی مشترکہ اقدار کو اجاگر کیا۔