مہندر سنگھ دھونی آئی سی سی ہال آف فیم میں شامل، اعزاز ملنے پر سابق کپتان نے کیا خوشی کا اظہار

نئی دہلی//
کرکٹ کے سب سے بڑے ادارے انٹرنیشنل کرکٹ کاؤنسل نے ہندوستان کے سابق کپتان مہندر سنگھ دھونی کو آئی سی سی ہال آف فیم میں شامل کیا ہے۔ اس طرح دھونی یہ اعزاز حاصل کرنے والے ہندوستان کے 11ویں کرکٹر بن گئے ہیں۔ اس سے پہلے بشن سنگھ بیدی، کپل دیو، سنیل گواسکر، انل کمبلے، سچن تندولکر، وینو مانکڑ، وریندر سہواگ، راہل دراوڑ، نیتو ڈیوڈ اور ڈائنا ایڈلجی کو آئی سی سی ہال آف فیم میں جگہ مل چکی ہے۔
مہندر سنگھ دھونی کا شمار دنیا کے عظیم ترین کپتانوں میں ہوتا ہے۔ ان کی کپتانی میں ٹیم انڈیا نے تین آئی سی سی ٹرافی پر قبضہ کیا تھا۔ بطور کپتان دھونی نے 2007 کا ٹی-20 عالمی کپ، 2011 کا یک روزہ عالمی کپ اور 2013 کی چمپئنز ٹرافی اپنے نام کی تھی۔
آئی سی سی ہال آف فیم میں شامل ہونے پر مہندر سنگھ دھونی نے کہا ہے کہ یہ اعزاز ہمیشہ ان کے ساتھ رہے گا۔ انہوں نے کہا کہ آئی سی سی ہال آف فیم میں شامل ہونا بڑی عزت کی بات ہے، جو مختلف نسلوں اور دنیا بھر کے کرکٹرز کے تعاون کو تسلیم کرتا ہے۔ ایسے عظیم کھلاڑیوں کے ساتھ اپنا نام یاد کیا جانا ایک حیرت انگیز احساس ہے۔ یہ کچھ ایسا ہے جسے وہ ہمیشہ دل کے قریب رکھیں گے۔
مہندر سنگھ دھونی نے ہندوستان کے لیے 350 ونڈے میچ کھیلے ہیں جس میں 50.57 کی اوسط سے 10773 رن بنائے۔ اس دوران انہوں نے 10 سنچری اور 73 نصف سنچری لگائے۔ انہوں نے 90 ٹیسٹ میچوں میں بھی ہندوستان کی نمائندگی کی۔ اس میں ان کا اوسط 38 سے زیادہ کا رہا۔ انہوں نے 6 سنچری کے ساتھ 4876 ٹیسٹ رن بنائے۔ دھونی نے سال 2019 میں عالمی کپ سیمی فائنل میں نیوزی لینڈ کے خلاف اپنا آخری بین الاقوامی میچ کھیلا تھا اور اگلے سال اگست 2020 میں بین الاقوامی کرکٹ سے سبکدوشی اختیار کرلی تھی۔ وہ ابھی آئی پی ایل میں اپنا جلوہ دکھا رہے ہیں۔
دھونی کے علاوہ آسٹریلیا کے سابق قد آور بلے باز میتھیو ہیڈن، نیوزی لینڈ کے کپتان ڈینیل ویٹوری، جنوبی افریقہ کے معروف بلے باز ہاشم آملہ اور گریم اسمتھ کو بھی آئی سی سی ہال آف فیم میں جگہ ملی ہے۔ اس سال 5 مرد اور 2 خاتون کرکٹرز کو یہ اعزاز حاصل ہوا ہے۔ مردوں کے علاوہ انگلینڈ کی قد آور کھلاڑی سارہ ٹیلر اور پاکستان کی ثنا میر کو بھی آئی سی سی ہال آف فیم میں شامل کیا گیا ہے۔