اڈانی ایئرپورٹس نے 75 کروڑ ڈالر جمع کیے ، ہوائی اڈوں کی ترقی کو رفتار ملے گی

نئی دہلی// ملک کے سب سے بڑے نجی ہوائی اڈہ آپریٹر اڈانی ایئرپورٹس ہولڈنگز لمیٹڈ (اے اے ایچ ایل) نے بین الاقوامی بینکوں کے ایک گروپ سے ایکسٹرنل کمرشل بوروئنگ (ای سی بی) کے ذریعے 75 کروڑ ڈالر کا فنانسنگ حاصل کیا ہے ۔
کمپنی نے بدھ کے روز یہاں جاری کردہ بیان میں کہا کہ اس لین دین کی قیادت فرسٹ ابوظہبی بینک، بارکلیز پی ایل سی، اور اسٹینڈرڈ چارٹرڈ بینک نے کی۔ حاصل کردہ فنانسنگ کا ایک حصہ موجودہ 40 کروڑ ڈالر کے قرض کے ری فائنانس کے لیے استعمال کیا جائے گا جبکہ باقی رقم احمد آباد، لکھنؤ، منگلورو، جے پور، گوہاٹی اور تیروواننت پورم جیسے بڑے ہوائی اڈوں کے بنیادی ڈھانچے کو بہتر بنانے اور غیر ہوابازی کاروباروں جیسے کہ ریٹیل، ایف اینڈ بی، ڈیوٹی فری اور دیگر خدمات کے توسیع کے لیے استعمال کی جائے گی۔
اے اے ایچ ایل نے مالی سال 2024-25 کے دوران 9.4 کروڑ مسافروں کو خدمات فراہم کیں جبکہ اس کی کل صلاحیت 11 کروڑ مسافروں کی ہے ۔ کمپنی کا ہدف سال 2040 تک سالانہ 30 کروڑ مسافروں کی صلاحیت حاصل کرنا ہے ۔ اس روڈ میپ میں نوی ممبئی انٹرنیشنل ایئرپورٹ اہم کردار ادا کرے گا، جس کا پہلا مرحلہ جلد شروع ہونے کی توقع ہے اور جس کی سالانہ صلاحیت کو مرحلہ وار نو کروڑ مسافروں تک بڑھایا جائے گا۔