بی جے پی نے کرناٹک میں خواتین کے خلاف جرائم پر پرینکا کی خاموشی پر سوال اٹھایا

نئی دہلی//بھارتیہ جنتا پارٹی (بی جے پی) نے کرناٹک میں نابالغ لڑکیوں کی عصمت دری کے واقعات پر کانگریس لیڈر پرینکا وڈرا پر آج سخت حملہ کرتے ہوئے کہا کہ محترمہ وڈرا، جو کسی بھی ناانصافی کے خلاف ‘‘لڑنے والی’’ لڑکی ہونے کا دعویٰ کرتی ہیں، نے ملک میں خواتین کے خلاف بڑھتے ہوئے جرائم پر ‘‘خاموشی’’ برقرار رکھی ہے ۔
بی جے پی کے ترجمان شہزاد پونا والا نے یہاں ایک بیان میں سوال کیا کہ جب کانگریس کے زیر اقتدار بیلگاوی اور ریاست کے دیگر حصوں میں ایک نابالغ لڑکی کی اجتماعی عصمت دری جیسے ہولناک واقعات ہوتے ہیں تو محترمہ وڈرا کیوں خاموش رہتی ہیں۔
مسٹر پونا والا نے کرناٹک میں کانگریس حکومت پر امن و امان برقرار رکھنے میں ناکام رہنے اور اقتدار کی اندرونی کشمکش میں پھنسنے کا الزام لگایا۔ انہوں نے کہا کہ اقتدار میں آنے کے بعد سے کرناٹک حکومت کی واحد توجہ عوام کی پریشانیوں کو دور کرنے کے بجائے سیاسی عہدوں کو حاصل کرنے اور وزیر اعلیٰ، نائب وزیر اعلیٰ اور وزیر داخلہ کون بنے گا اس پر مرکوز ہے ۔
بی جے پی لیڈر نے الزام لگایا کہ حکومت ٹیکسوں میں اضافہ اور عوامی پیسے کے غلط استعمال کے ذریعے شہریوں پر بھاری بوجھ ڈالنے میں مصروف ہے جبکہ ریاست میں امن و امان کی صورتحال بالخصوص خواتین کی حفاظت مکمل طور پر تباہ ہوچکی ہے ۔