ڈل میں ہاؤس بوٹ ڈوب گیاسات سیاح بال بال بچ گئے

سرینگر//
جھیل ڈل میں جمعرات کی صبح ایک ہاؤس بوٹ کے الٹنے سے سات سیاح اور دو کنبوں کے افراد خانہ معجزاتی طور پر بچ گئے ۔
ذرائع نے بتایا کہ جھیل ڈل میں جمعرات کی صبح ’کولہائی‘ نامی ہاؤس بوٹ ڈوب گیا۔انہوں نے کہا کہ جب یہ ہاؤس بوٹ ڈوب رہا تھا اس وقت اس میں سات سیاح اور دو کنبوں کے افراد خانہ موجود تھے ۔
ہاؤس بوٹ کے مالک‘محمدیوسف نے بتایا کہ ہم نے پہلے سات سیاحوں کو بحفاظت باہر نکالا اور ان کو محفوظ مقام پر پہنچایا اور اس کے بعد دیگر اہل خانہ کو باہر نکالا۔انہوں نے کہا کہ میرا ہاؤس بوٹ پرانا ہے جس کی مرمت کے لئے متعلقہ حکام سے اجازت طلب کی تھی لیکن میری درخواست پر کان نہیں دھرا گیا۔ان کا کہنا تھا کہ اگر حکام نے انہیں اس کی مرمت کی اجازت دی ہوتی تو آج یہ واقعہ پیش نہیں آتا۔
یوسف نے کہا کہ ہم آج بے گھر ہوگئے ہیں کیونکہ ہماری ہاؤس بوٹ کو کافی نقصان پہنچا ہے ۔انہوں نے حکام سے اس کی مرمت کرنے کے لئے اجازت اور نقصان کا معاوضہ دینے کی اپیل کی۔