کشتواڑ کے چھاترو علاقے میں دوسرے روز بھی آپریشن جاری

جموں//
جموں و کشمیر کے ضلع کشتواڑ کے گھنے جنگلاتی علاقے چھاترو-سنگھ پورہ میں جاری انسدادِ دہشت گردی آپریشن جمعے کو دوسرے روز بھی جاری رہا، جہاں تین سے چار جیشِ محمد سے وابستہ دہشت گردوں کے چھپے ہونے کی اطلاعات ہیں۔
سکیورٹی فورسز نے علاقے کا مکمل محاصرہ کر رکھا ہے جبکہ جموں و کشمیر پولیس کے ڈائریکٹر جنرل (ڈی جی پی) نالن پربھات آپریشن کی از خود نگرانی کر رہے ہیں۔
ذرائع کا کہنا ہے کہ محصور دہشت گردوں کی تعداد تین سے چار کے درمیان ہو سکتی ہے ، جن میں سے بعض کا تعلق ممنوعہ تنظیم جیشِ سے ہے ۔ دہشت گرد گھنے جنگلات اور دشوار گزار پہاڑی علاقے میں چھپے ہوئے ہیں، جس کی وجہ سے آپریشن میں پیچیدگیاں پیدا ہو رہی ہیں۔ تاہم، فورسز نے علاقے کی مکمل ناکہ بندی کر کے دہشت گردوں کے تمام ممکنہ فرار کے راستے بند کر دیے ہیں۔
ذرائع کے مطابق، فوج، پولیس اور سی آر پی ایف پر مشتمل مشترکہ ٹیمیں وسیع علاقے میں تلاشی مہم میں مصروف ہیں۔ علاقے میں ڈرونز اور تھرمل امیجنگ آلات کی مدد سے مسلسل نگرانی کی جا رہی ہے تاکہ دہشت گردوں کی نقل و حرکت پر قریبی نظر رکھی جا سکے ۔
جمعے کی صبح فورسز نے دوبارہ تازہ دم دستوں کے ساتھ علاقے میں سرچ آپریشن کا دائرہ وسیع کیا۔ جنگل میں چھپے دہشت گردوں کو ڈھونڈ نکالنے کے لیے ہیلی کاپٹروں اور جدید ٹیکنالوجی کی مدد بھی لی جا رہی ہے ۔
اس دوران ڈی جی پی نالن پربھات نے آئی جی پی جموں بھیم سین تُتی، ڈی آئی جی شری دھر پاٹل اور دیگر اعلیٰ افسران کے ہمراہ جائے وقوع کا دورہ کیا اور آپریشن میں شریک اہلکاروں سے ملاقات کر کے ان کی پیشہ ورانہ لگن اور قربانیوں کو سراہا۔ انہوں نے ہدایت دی کہ دہشت گردوں کو انجام تک پہنچانے کے لیے آپریشن کو پوری قوت کے ساتھ جاری رکھا جائے ۔
پولیس ترجمان نے بتایا کہ ایس ایس پی کشتواڑ اور دیگر سینیئر افسران موقع پر ہی کیمپ کیے ہوئے ہیں تاکہ تمام سیکیورٹی ایجنسیوں کے درمیان بہتر تال میل قائم رہے اور آپریشن کو مؤثر انداز میں پایہ تکمیل تک پہنچایا جا سکے ۔
سیکورٹی فورسز نے علاقے میں بڑے پیمانے پر کومبنگ آپریشن شروع کیا ہے تاکہ چھپے ہوئے دہشت گردوں کو تلاش کر کے انہیں انجام تک پہنچایا جاسکے ۔
قابل ذکر ہے کہ چھاترو کا علاقہ گزشتہ کچھ عرصے سے ملی ٹینٹوں کی نقل و حرکت کے حوالے سے حساس مانا جا رہا ہے اور حالیہ اطلاعات کے بعد سیکیورٹی فورسز نے یہ کارروائی شروع کی ہے ۔
آپریشن کے متعلق مزید تفصیلات کا انتظار ہے ، تاہم سیکیورٹی فورسز نے اس عزم کا اعادہ کیا ہے کہ امن دشمن عناصر کو ہر حال میں کیفر کردار تک پہنچایا جائے گا۔