مرکزی حکومت راہل کے ساتھ دشمن جیسا سلوک کر رہی ہے: گہلو ت

نئی دہلی// کانگریس کے سینئر لیڈر اور راجستھان کے وزیر اعلی اشوک گہلوت نے ملک کے ماحول کو تشویشناک بتاتے ہوئے کہا ہے کہ کانگریس کے سابق صدر راہل گاندھی سے 50 گھٹنے تک انفورسمنٹ ڈائریکٹوریٹ-ای ڈی کی پوچھ گچھ میں پولیس کا رویہ دشمن جیسا رہا اور پہلے کبھی کسی حکومت نے اپوزیشن کے ساتھ اس طرح کا سلوک نہیں کیا۔
بدھ کو یہاں پارٹی ہیڈکوارٹر میں منعقدہ ایک پریس کانفرنس سے خطاب کرتے ہوئے مسٹر گہلوت نے کہا کہ اپوزیشن کے ساتھ ایسا سلوک پہلی بار دیکھا گیا ہے۔ کانگریس کارکنوں اور خاص کر خواتین کارکنوں کے خلاف بے حیائی کا ارتکاب کیا گیا ہے۔ مسٹر گاندھی سے 50 گھنٹے تک پوچھ گچھ اور اس دوران پولس انتظامیہ کا آمرانہ رویہ پہلے کبھی کسی سیاسی پارٹی لیڈر کے ساتھ نہیں دیکھا گیا۔انہوں نے کہا کہ سیاست میں اپوزیشن اکثر عوامی مسائل کے لیے ایسا کرتی ہے لیکن پہلی بار دیکھا گیا کہ اپوزیشن لیڈر کے ساتھ دشمن جیسا سلوک کیا گیا ہے۔
انہوں نے کہا کہ ریاستوں میں بھی اپوزیشن ہے اور بی جے پی کئی ریاستوں میں اپوزیشن میں ہے لیکن کانگریس حکومت ان کے ساتھ ایسا سلوک نہیں کرتی جیسا کہ مرکز نے مسٹر گاندھی کے ساتھ کیا۔ یہ خطرناک ہے اور اب یہ کہنا مشکل ہو گیا ہے کہ ملک کس طرف جا رہا ہے، اس لیے وقت آ گیا ہے کہ عوام سچ کے ساتھ کھڑے ہوں۔
مسٹر گہلوت نے کہا کہ حکومت نوجوانوں کے ساتھ بھی ناانصافی کر رہی ہے، ملک کی معیشت خراب ہو چکی ہے، بے روزگاری اپنے عروج پر ہے اور حکومت ان مسائل پر سنجیدگی سے غور کرنے کے بجائے، ان مسائل کو اٹھانے کے لیے اپوزیشن کو ڈرانے اور دھمکانے کی کوشش کر رہی ہے۔