کانگریس ورکنگ کمیٹی نے ایک آواز میں ‘آپریشن سندور’ کی حمایت کی

نئی دہلی//کانگریس نے آپریشن سندور کے بعد بدھ کو پارٹی کی اعلیٰ پالیسی ساز ادارے کانگریس ورکنگ کمیٹی کا غیر رسمی ہنگامی اجلاس طلب کیا، جس میں پہلگام حملے کے جواب میں مسلح افواج کی کارروائی کی متفقہ طور پر ایک آواز میں حمایت کی گئی۔
کانگریس ورکنگ کمیٹی کی میٹنگ کے بعد کانگریس کے صدر ملکارجن کھڑگے اور سابق صدر راہل گاندھی نے صحافیوں سے گفتگو کرتے ہوئے کہا کہ کانگریس ملک کے بہادر سپاہیوں کی جرات مندانہ کارروائی کی ستائش کرتی ہے اور دہشت گردی کے خلاف اٹھائے جا رہے ہر قدم میں ملک کے ساتھ کھڑی ہے ۔ اچانک اور غیر رسمی طور پر بلائی گئی اس میٹنگ میں دہلی میں موجود پارٹی کے تمام سینئر رہنماؤں سے شرکت کی اپیل کی گئی تھی۔
مسٹرکھڑگے نے کہا:”ملک میں جو واقعہ پیش آیا ہے اور اس کے پیش نظر حکومت جو اقدامات اٹھا رہی ہے ، اس پر آج ہم نے کانگریس ورکنگ کمیٹی کی میٹنگ طلب کی ۔ ہمیں اپنی مسلح افواج پر فخر ہے جنہوں نے آپریشن سندور کے تحت پاکستان اور پاکستان کے زیر قبضہ کشمیر (پی او کے ) میں دہشت گردوں کے ٹھکانوں پر بہادری اور فیصلہ کن کارروائی کرتے ہوئے سخت جواب دیا ہے ۔ ہم اپنے بہادر فوجیوں کی جرات، عزم اور حب الوطنی کو سلام پیش کرتے ہیں۔”
انہوں نے مزید کہا:”پہلگام میں ہوئے دہشت گرد حملے کے دن سے ہی کانگریس نے واضح طور پر مسلح افواج اور حکومت کے ساتھ یکجہتی کا اظہار کرتے ہوئے سرحد پار دہشت گردی کے خلاف ہر فیصلہ کن اقدام کی حمایت کی ہے ۔ پاکستان اور پی او کے سے جنم لینے والی دہشت گردی کی تمام شکلوں کے خلاف ہندوستان کی قومی پالیسی بالکل واضح اور غیر متزلزل ہے ۔ ملک کی یکجہتی اور سالمیت کی حفاظت کے لیے ہر سطح پر اتحاد کی سب سے زیادہ ضرورت ہے ۔ کانگریس ملک کے بہادر جوانوں کے ساتھ کندھے سے کندھا ملا کر کھڑی ہے ۔”
کانگریس صدر نے کہا:”تاریخ گواہ ہے کہ ہمارے ہیروز نے ہمیشہ قومی مفاد کو اولین ترجیح دیتے ہوئے ملک کی یکجہتی اور سالمیت کے لیے اپنی شہادت تک دی ہے ۔ ہمارے فوجیوں کو ملک کی یکجہتی، ہماری آزادی اور ملک کی سالمیت کے لیے ہماری مکمل حمایت حاصل ہے ۔ اس معاملے پر کوئی اختلاف نہیں ہے اور ہم متحد ہو کر ملک کے دفاع میں اپنا مکمل ساتھ دے رہے ہیں۔ انڈیا اتحاد کی بھی یہی رائے ہے ۔ کانگریس ورکنگ کمیٹی میں ہمارا یہی ایجنڈا تھا اور سبھی نے متفقہ طور پر اس معاملے کی حمایت کی ہے ۔”
راہل گاندھی نے کہا، ‘‘ورکنگ کمیٹی کے اجلاس میں اس بارے میں بحث ہوئی اور متفقہ طور پر ورکنگ کمیٹی نے فوجی کارروائی کی حمایت کی ہے ۔ ہم کانگریس پارٹی اور ورکنگ کمیٹی کی جانب سے مسلح افواج کو اپنی مکمل حمایت دیتے ہیں۔ انہیں ڈھیر ساری نیک خواہشات اور بہت سارا پیار۔ ہم مکمل حمایت دیتے ہیں۔’’