کوہلی کے مداح آپے سے باہر؛ ایک اور کرکٹر کی بہن کو ٹرول کرنے لگے

نئی دہلی//
انڈین پریمئیر لیگ (آئی پی ایل) میچ میں فتح کے بعد اسٹار بیٹر ویرات کوہلی کے مداحوں نے شبمن کی بہن، روہت کی بیٹی اور کے ایل راہول کی اہلیہ کے بعد شریاس ائیر کی بہن کو نشانے پر رکھ لیا۔
میڈیا رپورٹس کے مطابق بھارتی کرکٹر شریاس ایئر کی بہن شریستا نے ویرات کوہلی کے مداحوں کی جانب سے بھائی کو تنقید کا نشانہ بنائے جانے پر سخت ردعمل دیدیا۔
انڈین پریمیئر لیگ (آئی پی ایل) 2024 کے میچ 37 میں رائل چیلنجرز بنگلور (آر سی بی) کے خلاف پنجاب کنگز (پی بی کے ایس) کی شکست کے بعد ٹیم کے کپتان شریاس ایئر کو سوشل میڈیا پر ٹرول کیا گیا، جس میں انکی فیملی پر بھی تنقید کی گئی تھی۔
ٹرولنگ کے دوران فیملی کا ذکر کرنے پر شریاس ایئر کی بہن شریستا نے شدید برہمی کا اظہار کیا اور انسٹاگرام پر اسٹوری شیئر کی کہ "لوگ صرف سپورٹ کرنے پر کھلاڑی کے خاندان کو نشانہ بناتے ہیں۔ چاہے ہم اسٹیڈیم میں موجود ہوں یا دور سے سپورٹ کر رہے ہوں، ہماری ٹیم کے لیے محبت ہمیشہ برقرار رہتی ہے۔ جو لوگ مجھ پر انگلی اٹھا رہے ہیں، ان کی تنگ نظری نہ صرف مضحکہ خیز ہے بلکہ شرمناک بھی ہے”۔
انہوں نے مزید کہا کہ "میں نے کئی میچز میں شریاس کو سپورٹ کیا ہے، جن میں سے زیادہ تر جیت میں ختم ہوئے۔ لیکن شاید اسکرین کے پیچھے بیٹھ کر ٹرول کرنے والوں کے لیے حقائق کوئی معنی نہیں رکھتے”۔
یہ پہلا موقع نہیں ہے جب کسی کھلاڑی کے خاندان کو نشانہ بنایا گیا ہو، اس سے قبل شبمن گِل کی بہن، روہت شرما کی بیٹی اور کے ایل راہل کی اہلیہ کو بھی کوہلی کے مداحوں نے ہراساں کیا تھا۔