روہت، کوہلی، جڈیجہ، بمراہ کو اےپلس کنٹریکٹ ملا، شریاس اور ایشان کی ہوئی واپسی

ممبئی// بورڈ آف کنٹرول فار کرکٹ ان انڈیا (بی سی سی آئی) کی جانب سےسال 2024-25 کے لیے آج جاری کردہ کنٹریکٹ لسٹ کے اے پلس زمرے میں ٹی 20 سے ریٹائر ہو چکے روہت شرما، وراٹ کوہلی اور رویندر جڈیجہ برقرار ہیں نیز گزشتہ سال ڈومیسٹک میچ نہ کھیلنے پر تادیبی کارروائی کے بعد شریاس ائیر کو کیٹیگری بی اور ایشان کشن کو کیٹیگری سی کا کنٹریکٹ ملا ہے بی سی سی آئی نے پیر کو 1 اکتوبر 2024 سے 30 ستمبر 2025 تک کل 34 کھلاڑیوں کو کنٹریکٹ دیا ہے۔ ایک روزہ ورلڈ کپ کے بعد مسلسل بین الاقوامی کرکٹ سے باہر رہنے کے بعد چیمپئنز ٹرافی سے ٹھیک پہلے واپسی کرنے والے تجربہ کار تیز گیند باز محمد شامی کیٹیگری اے میں برقرار ہیں۔ کے ایل راہل، شبمن گل، ہاردک پانڈیا اور رشبھ پنت اسی زمرے میں ہیں۔ پنت کو گروپ بی سے گروپ اے میں ترقی دی گئی ہے۔ ہندوستانی ٹی 20 ٹیم کے کپتان سوریہ کمار یادو اور نائب کپتان اکشر پٹیل کو بی کیٹیگری میں رکھا گیا ہے۔ بی کیٹیگری کے کنٹریکٹ لسٹ میں سوریہ کمار یادو، کلدیپ یادو، اکسر پٹیل، یشسوی جیسوال اور شریاس ائیر شامل ہیں۔
سب سے زیادہ 19 کھلاڑیوں کو سی کیٹیگری میں رکھا گیا ہے۔ ایشان کشن کی سی کیٹیگری میں واپسی ہوئی ہے۔ اس گروپ میں رنکو سنگھ، تلک ورما، رتوراج گائیکواڑ، شیوم دوبے، روی بشنوئی، واشنگٹن سندر، مکیش کمار، سنجو سیمسن، ارشدیپ سنگھ، پرسدھ کرشنا، رجت پاٹیدار، دھرو جوریل، سرفراز خان، نتیش کمار ریڈی، ابھیشیک شرما، آکاش دیپ، ورون چکر ورتی اور ہرشت رانا شامل ہیں۔