چیمپئینز ٹرافی فائنل ہارے تو روہت شرما ریٹائر ہوجائیں گے؟

دوبئی//
آئی سی سی چیمپئینز ٹرافی کے فائنل میں شکست ہوئی تو بھارتی کپتان روہت شرما انٹرنیشل کرکٹ سے ریٹائر ہوسکتے ہیں۔
بھارتی اخبار رونامہ جاگرن نے اپنی رپورٹ میں انکشاف کیا ہے کہ بھارتی کرکٹ بورڈ (بی سی سی آئی) ذرائع کا بتانا ہے کہ 9 مارچ اتوار کو نیوزی لینڈ کیخلاف چیمپئینز ٹرافی کے فائنل میں بھارت کو شکست ہوئی تو کپتان روہت شرما ریٹائر ہوسکتے ہیں۔
البتہ بورڈ ذرائع نے جیت پر روہت شرما کے مستقبل سے متعلق کوئی بات شیئر نہیں کی تاہم اعلیٰ عہدیدار کا کہنا ہے کہ دونوں صورتوں میں فیصلہ بھارتی کپتان کا ہوگا۔
رپورٹس میں مزید کہا گیا ہے کہ ہندوستان چیمپیئنز ٹرافی 2025 کا فائنل جیتتا ہے تو اس بات کا قوی امکان ہے کہ روہت شرما ون ڈے فارمیٹ محض بطور پلئیر کھیلیں گے جبکہ کپتانی ہاردک پانڈیا یا شبمن گل کے سپرد ہوسکتی ہے۔
دوسری جانب آسٹریلیا کے خلاف بارڈر گواسکر ٹرافی میں بدترین شکست کے بعد شدید تنقید کی زد میں تھے جبکہ ٹی20 ورلڈکپ 2024 میں فتح کے بعد روہت شرما پہلے ہی مختصر فارمیٹ سے ریٹائر ہوچکے ہیں۔
بھارتی ٹیم کے اگلی ٹیسٹ سیریز رواں برس جون میں انگلینڈ کیخلاف کھیلنی ہے جبکہ بھارت کا اگلا ہدف ون ڈے ورلڈکپ 2017 جیتنا ہے۔